Əli Həsənov Azərbaycanlı diplomatları satqınlıqda ittiham edib və Aİ dövlətlərinə göstəriş verib

Qaçqınların işi üzrə Dövlət Komitəsinin rəhbəri, baş nazirin müavini Əli Həsənov bu gün öz idarəsində Avropa Parlamentinin Azərbaycan üzrə qəbul etdiyi qətnamə ilə bağlı tədbir keçirib.

Görüşə işğal altında olan rayonların rəhbərləri və bu ərazilərdən olan deputatlar dəvət edilmişdi.

Həsənov Avropa Parlamentinin Azərbaycanda insan hüquqlarını tənqid edən qətnaməsini pisləyib, Avropa Parlamentini “səlahiyyətlərini aşmaqda” ittiham edib, belə ki, Azərbaycan üzrə sənədlərin qəbulu onun səriştələrinə aid deyil.

Həsənov qətnaməni “Azərbaycanın nailiyyətlərinə qarşı qısqanclıq və paxıllığın” təzahürü kimi qiymətləndirib. Eyni zamanda, Azərbaycan ordusunun güclənməsindən qorxan erməni diasporası avropalılara təsir edir, deyə o bildirib.

Daha sonra Həsənov Avropanın “50-60 min” qaçqın probleminin həllində aciz olduğunu qeyd edərək, 1 mln. məcburi köçkünün işini həll edən Azərbaycandan nümunə götürməyə çağırıb.

O, həmçinin Azərbaycanlı diplomatları Avropa parlamentariləri ilə pis işləməkdə tənqid edib. Bu zaman o, ölkələr üzrə qətnaməyə səs verənlər haqqında məlumatları açıqlayıb.

86 alman deputatdan 46-sı, 17 Avstriyalı deputatdan 12-si, 13 Danimarkalı deputatdan 8-i, 5 Estoniyalı deputatdan 4-ü, 47 İspaniyalı deputatdan 34-ü və İtaliyalı deputatların əksəriyyəti Azərbaycan əleyhinə qətnamənin lehinə səs veriblər. “Bu ölkələrdəki səfirlərimiz nə ilə məşğuldurlar?”, deyə Həsənov qəzəblənib.

“Onlar uzun illərdir səfir vəzifəsini tutarkən nə edirlər? Bəziləri öz bizneslərini qururlar, digərləri isə satqınlıq edir”, deyə o əlavə edib.

“Bizim nümayəndə heyətlərimizin əksəriyyəti heç bir iş həyata keçirməyib, onlar Avropaya turist kimi gedirdilər”, deyə Əli Həsənov bildirib.

Görüşün nəticələrinə görə prezident İlham Əliyevə müraciət qəbul edilib. Sənəddə “dövlət başçısı ətrafında “daha sıx” birləşmək” çağırışı yer alır.

Müraciətdə həmçinin Avropa Parlamentinə ədalətsiz qətnaməni ləğv etmək, Aİ dövlət başçılarını isə “Avropa Parlamentindəki deputatlarını daha ədalətli deputatlarla əvəz etmək” çağırışı yer alır. -06D-