Əli Həsənov KİV-i yanlış məlumata görə cəzalandırmaqla hədələyir

Dövlət başçısının müşaviri Əli Həsənov KİV tərəfindən sui-istifadə faktlarının artdığını bildirib.

AzərTAc-a müsahibəsində o bildirib ki, “KİV-lərin sərbəst fəaliyyəti üçün yaradılmış əlverişli şəraitdən son zamanlar sui-istifadə halları artıb”.

Xüsusən, o, Xüsusilə internet media orqanlarında müxtəlif dövlət strukturları və onların rəhbərləri haqqında “həqiqətə uyğun olmayan”, əsassız, qərəzli, hətta şantaj xarakterli məlumatlar yayılmasından narazılığını bildirib.

“Vəzifəli şəxslərin guya işdən “kənarlaşdırılması”, rəhbərlik etdikləri qurumlarda “yoxlamalar”, evlərində “axtarışlar” aparılması, məmurların “həbsi”, vəzifələrindən uzaqlaşdırılmış bəzi dövlət qurumlarının rəhbərləri ilə “əməkdaşlığı” və s. bu tipli qərəzli məlumatlar məqsədli şəkildə dövriyyəyə buraxılır. Əminliklə demək olar ki, belə məlumatlar yayan KİV-lər bununla öz tirajlarını artırmağa və mənfəət əldə etməyə çalışırlar. Diqqətə çatdırıram ki, bu tipli fəaliyyət qanuna ziddir və birbaşa hüquqi məsuliyyət doğurur.

Təəssüf ki, bəzi hallarda aparıcı KİV-lər də belə dezinformasiyaları tirajlayaraq öz oxucularını çaşdırırlar”, deyə Həsənov bildirib.

O, jurnalist birliklərini, xüsusən Mətbuat Şurasını bu hallara qarşı tədbirlər görməyə çağırıb. Əks halda qanunu pozanlara qarşı “müvafiq hüquqi ölçü götürüləcək”, deyə Həsənov bildirib.

Maraqlıdır ki, o, bir KİV-in belə adını çəkməyib və ya bu cür nöqsanlara yol verən hər-hansı konkret mövzunu göstərməyib. Amma təxmin etmək çətin deyil ki, söhbət MTN-də, Rabitə Nazirliyində həbslərdən, bu idarələrdə törədilmiş cinayətlərdən gedir. -02D-