Əli Həsənov Qarabağa dair danışıqların başlanacağını bildirib

Dövlət başçısının köməkçisi Əli Həsənov bildirib ki, yaxın günlərdə Qarabağ nizamlanması üzrə danışıqların intensiv mərhələsi başlanacaq.

Bazar günü «Xəzər TV»yə müsahibəsində Ə.Həsənov deyib ki, Azərbaycan danışıqların intensivləşdirilməsini və Azərbaycan torpaqlarının azad olunmasını tələb edir.

Sonra o deyib ki, ermənilər RF prezidenti Vladimir Putinin çağırışından sonra atəşi dayandırmağa   razılaşıblar.

Eyni zamanda tanınmış moskvalı politoloq, RF prezidenti yanında İctimai Palatanın üzvü Sergey Markov bildirib ki, gələcək saziş Qarabağ ətrafında ən azı 5 rayonun azad edilməsini nəzərdə tutur. Bu, cari ilin sonunadək baş verməlidir.

Xatırladaq ki, RF XİN rəhbəri Sergey Lavrov Bakıda olarkən Qarabağ ətrafında rayonların azad edilməsindən və regionun statusunun müəyyən olunmasından danışıb.

Beləliklə, Ə.Həsənovun sözləri danışıqlar təşəbbüsünün Moskvadan gəldiyini təsdiqləyir. Qeyd edək ki, ATƏT-in Minsk Qrupunun həmsədrləri Lavrovun bəyanatını və nizamlanma ilə bağlı müzakirə olunan digər variantları  heç cür şərh  etmirlər.  -02D-