Əli İnsanov məhkəmədə hakimiyyəti ittihamedici bəyanatlar verib (YENİLƏNİB)

Bu gün Bakı Apellyasiya Məhkəməsində hakim Qədim Babayevin sədrliyi ilə keçmiş səhiyyə naziri Əli İnsanovun cinayəti işi üzrə təkrar məhkəmə prosesi başlayıb.

Əli İnsanov 2005-ci il parlament seçkiləri ərəfəsində həbs edilib. O, əvvəlcə dövlət çevrilişinə cəhddə ittiham olunub, daha sonra ittiham ayrıca icraata ayrılıb və 2007-ci ilin aprelində o, iqtisadi cinayətlərə görə mühakimə olunub və 11 il azadlıqdan məhrumetmə cəzasına məhkum edilib.

Noyabrın 15-də Azərbaycan Ali Məhkəməsinin Plenumu Avropa İnsan Hüquqları Məhkəməsinin (AİHM) Əli İnsanovla bağlı qərarına baxaraq, Ali Məhkəmənin və Bakı Apellyasiya Məhkəməsinin onun işi üzrə hökmlərini ləğv edib. Eyni zamanda, plenum birinci instansiya məhkəməsinin İnsanovun 11 il müddətinə azadlıqdan məhrum edilməsi haqqında hökmünü qüvvədə saxlayıb. Lakin Plenumun qərarına əsasən, AİHM-nin göstərişi nəzərə alınmaqla, iş təkrar məhkəmə istintaqı üçün Bakı Apellyasiya Məhkəməsinə göndərilib.

Bugünki məhkəmənin gedişində vəkillər İnsanovun dəmir barmaqlıqlar arxasından çıxarılaraq müdafiə tərəfinin yanında oturdulması, cinayət işinə bəraətverici əsasla xitam verilməsi, qəti imkan tədbirinin ləğv edilməsi ilə bağlı vəsatət qaldırıb. Məhkəmə heyəti hər hansı əsas göstərmədən vəsatətləri təmin etməyib.

Bu zaman Əli İnsanov məhkəmənin siyasi sifarişlə işlədiyini bildirib və məhkəmə heyətinə etiraz edib. Bu səbəbdən məhkəmə prosesi yanvarın 31-i saat 14.30-dək təxirə salınıb. 

İnsanov məhkəmədə bir sıra ittihamedici və siyasi bəyanatlarla da çıxış edib. O bildirib ki, siyasi sifarişlə həbs edilib. “Sizin prezidentiniz İlham Əliyev mənim həbsdə saxlanmağım barədə göstəriş verib. Siz istəsəniz də, qanunlar imkan versə də məni həbsdən azad etməyəcəksiniz”, deyə o qeyd edib. 

Keçmiş nazir deyib ki, İlham Əliyevin onunla mübarizə aparmağa savadı və səviyyəsi çatmır. 

“Biz Heydər Əliyevə inanmışdıq. Amma buna çox təəssüf edirəm. İlham Əliyev isə Azərbaycan xalqı üçün yad ünsürdür”. 

İnsanov bildirib ki, İlham Əliyevin Kazinolarda nə qədər pul uduzması barədə gələcək məhkəmə proseslərində məlumat verəcək. 

O, hökuməti ittihamedici bəyanatlarla da çıxış edib, akademik Ziya Bünyadovun, jurnalist Elmar Hüseynovun güllələnməsində hazırkı hakimiyyəti günahlandırıb. Yeni Azərbaycan Partiyasının qurucularından olan Sirus Təbrizlini hazırkı hakimiyyətin zəhərlədiyini deyib. “Həkim kimi mən Sirus Təbrizlini müayinə etmişdim. O sağlam idi”.  

İnsanov NİDA Vətəndaş Hərəkatını dəstəklədiyini bildirib və həbsdə olan gənc fəalların valideynlərinə təşəkkür edib. “Azərbaycanın gələcəyi və Azərbaycan inqilabı bu gənclərlə bağlı olacaq”. 

O, həbsxanalarda insanlara işgəncələr verildiyini də diqqətə çatdırıb. -03B- 

2014 Yanvar 17 (Cümə) 12:55:49

Bakı Apellyasiya Məhkəməsində Sənan Hacıyevin sədrliyi ilə keçmiş səhiyyə naziri Əli İnsanovun Penitensiar Xidmət və Ədliyyə Nazirliyinə qarşı apellyasiya şikayətinə baxılması başlanıb.

Şikayət Avropa İnsan Hüquqları Məhkəməsinin Ə.İnsanova qarşı işgəncə faktını tanıması ilə əlaqədar verilib.

2013-cü il martın 14-də AİHM Ə.İnsanovun İnsan Hüquqları Konvensiyasının 3-cü maddəsi (işgəncələrin qadağan edilməsi) və 6-cı maddəsi (ədalətli məhkəmə çəkişməsi hüququ) ilə zəmanət verilmiş hüquqlarının pozulmasını tanıyıb və ona 10 min avro həcmində kompensasiyanın verilməsi haqda qərar çıxarıb.

Bununla əlaqədar Ə.İnsanov onun hüquqlarının Penitensiar Xidmət rəhbərliyi və şəxsən ədliyyə naziri Fikrət Məmmədov tərəfindən pozulmasının tanınmasını tələb edir.

Vəkil Toğrul Babayev Turan-a bildirib ki, iclasda Penitensiar Xidmətin nümayəndəsi iştirak edib, Ədliyyə Nazirliyi isə öz nümayəndəsini göndərməyib.

Ə.İnsanov bildirib ki, F.Məmmədov hesab edir ki, İlham Əliyevin qohumu olduğuna görə məhkəməni saymaya bilər, hətta öz nümayəndəsini belə göndərmir.

Ə.İnsanov F.Məmmədovun məhkəməyə gəlməsi ilə bağlı vəsatət qaldırıb. Hakimlər məşvərətə gediblər və qərara alıblar ki, Ədliyyə Nazirlyinin nümayəndəsi olmadan işə baxmaq olmaz. Növbəti proses yanvarın 31-nə təyin edilib.

Qeyd edək ki, bu gün Bakı Apellyasiya Məhkəməsində Ə.İnsanovun daha bir işi üzrə AHİM-in qərarına baxılacaq.

Məntiqə görə, Azərbaycanın məhkəmə orqanları Avropa məhkəməsinin qərarını icra etməlidir. Lakin Azərbaycan Ali Məhkəməsi ötən ilin oktyabrında işi təkrar baxılmaq üçün Apellyasiya Məhkəməsinə göndərib.

Ə.İnsanov 2005-ci ilin oktyabrında dövlət çevrilişinə cəhd ittihamı ilə həbs olunub.

2007-ci ilin aprelində rüşvət almaq, vəzifə səlahiyyətlərini aşmaq, bir sıra iqtisadi cinayətlər ittihamları ilə 11 il azadlıqdan məhrum edilib. Sonradan Ə.İnsanov hüquq-müdafiə təşkilatları tərəfindən siyasi məhbus kimi tanınıb.06D—