Əliyev BMT TŞ-də islahata və Ermənistanı hərbi təcavüzdən çəkindirməyə çağırıb

Bakı/22.09.20/Turan: İlham Əliyev sentyabrın 21-də BMT Baş Assambleyasının 75-ci sessiyası çərçivəsində keçirilən yüksək səviyyəli iclasda Qoşulmama Hərəkatının sədri və Azərbaycan prezidenti qismində videoformatda çıxış edib.

Qoşulmama Hərəkatının sədri olaraq Əliyev BMT Təhlükəsizlik Şurasında islahatın tərəfdarı olduğunu qeyd edib.

“Yaranmasının 75-ci ildönümündə biz BMT-nin gücləndirilməsi və müasirləşdirilməsi, Baş Assambleyanın canlandırılması, beynəlxalq sülh və təhlükəsizlik sahəsində təşkilatın demokratik, məsuliyyətli, universal və təmsilçiliyi təmin edən orqanı kimi nüfuzunun möhkəmləndirilməsi, habelə müasir geosiyasi reallıqlara cavab verən daha demokratik, məhsuldar, səmərəli, şəffaf və təmsilçiliyi təmin edən orqana çevrilməsi üçün BMT Təhlükəsizlik Şurasında islahatların aparılmasına çağırırıq”, deyən Əliyev islahatlar haqqında tezisin mahiyyətini açıqlamayıb.

Azərbaycan prezidenti olaraq Əliyev Ermənistanın hərbi fəallığı ilə bağlı narahatlığını bildirib.

“Təcavüzkar ritorika və təxribatlar Ermənistanın Azərbaycana qarşı yeni təcavüzə hazırlaşdığını nümayiş etdirir. Biz BMT-ni və beynəlxalq ictimaiyyəti Ermənistanın növbəti hərbi təcavüzdən çəkindirilməsinə dəvət edirik”, deyən Əliyev narahatlığını əsaslandıran bir sıra dəlillər gətirib. Buraya Ermənistanın baş naziri Nikol Paşinyanın “Qarabağ Ermənistandır, nöqtə” şüarında özünü göstərən radikal mövqeyi, hərbi təxribatlar və diversiyalar, nasizmin qəhrəmanlaşdırılması və s. var.

Əliyev Ermənistan-Azərbaycan münaqişəsinin Azərbaycanın ərazi bütövlüyü çərçivəsində və BMT Təhlükəsizlik Şurasının qətnamələri əsasında həll edilməli olduğu barədə mövqeyini dilə gətirib. -0-