Əliyev Rəisi ilə əldə edilmiş razılaşmaların reallaşacağına ümid edir

Azərbaycanın dövlət başçısı İlham Əliyev vertolyot qəzası zamanı həlak olan İran prezidenti Seyid İbrahim Rəisi ilə son görüşünü "tarixi görüş" adlandırıb.

«Dövlət sərhədində böyük infrastruktur layihəsinin açılışında birgə iştirakımız İran-Azərbaycan əlaqələrinin nə qədər möhkəm olmasından xəbər verirdi, həm xalqlarımıza, həm bütün dünyaya çox açıq mesaj idi ki, biz dostuq, qardaşıq, biz bundan sonra da birlikdə olacağıq. Açılış mərasimindən sonra həm mərhum prezident Rəisinin, həm də mənim rəsmi açıqlamalarımız çox ciddi siyasi məna daşıyırdı. Hər iki prezident açıq bəyan etmişdi ki, bu bölgənin gələcək inkişafında bölgədə yerləşən ölkələr fəal iştirak etməlidirlər», - bu gün Əliyev Rəisinin ölümü ilə əlaqədar başsağlığı vermək üçün İranın Azərbaycandakı səfirliyinə gedişi zamanı bildirib.

Onun sözlərinə görə, mayın 19-da "Xudafərin" və "Qız Qalası" hidroqovşaqlarının açılışı münasibətilə keçirilən mərasimdə iki ölkənin liderləri "İran-Azərbaycan əlaqələrinin inkişafının gələcək istiqamətlərini" təsdiqləyiblər.

« Bununla bərabər, biz konkret infrastruktur layihələri haqqında geniş fikir mübadiləsi aparmışdıq, önəmli qərarlar qəbul edilmişdi. O görüşdə iştirak edən şəxslər bunu, əminəm ki, İranın yeni rəhbərliyinə çatdıracaqlar. Əldə edilmiş bütün razılaşmalar, əminəm ki, icra ediləcək. Çünki bu, İran və Azərbaycan xalqlarının iradəsinə söykənir”, - prezident İlham Əliyev deyib.