Elmar Məmmədyarov Avropa İttifaqının baş katibinin müavini ilə görüşüb

Bakı/10.10.17/Turan: Azərbaycanın xarici işlər naziri Elmar Məmmədyarov Avropa İttifaqı baş katibinin müavini, Avropa Xarici Fəaliyyət Xidmətinin siyasi direktoru Jan-Kristof Belliard ilə görüşüb.

Xarici İşlər Nazirliyinin mətbuat xidmətinin məlumatına görə, görüşdə Azərbaycan və Avropa İttifaqı arasında əməkdaşlığın inkişafı, strateji tərəfdaşlığa dair saziş layihəsi üzrə danışıqların gedişi ətrafında fikir mübadiləsi aparılıb.

Nazir Elmar Məmmədyarov yeni sazişin siyasi, iqtisadi, ticarət, nəqliyyat, enerji, humanitar və digər sahələri əhatə etdiyini, Azərbaycanın Avropa İttifaqı ilə əlaqələrinin hərtərəfli inkişafı üçün mühüm çərçivə yaratdığını qeyd edib. Tərəflər Aİ və Azərbaycan arasında açıq səma sazişi üzrə danışıqların da uğurla davam etdiyini bildirib.

Jan-Kristof Belliard ölkədə mövcud olan stabilliyi və iqtisadi sahədə aparılan islahatları, o cümlədən ASAN xidmətin fəaliyyətini təqdir edib.

Görüşdə həmçinin Aİ Siyasi və Təhlükəsizlik Komitəsinin və Komitə yanında akkreditasiya olunan Aİ üzv ölkələrinin səfirlərinin Azərbaycana səfəri, sözügedən nümayəndə heyətinin dövlət başçısı tərəfindən qəbulu və aparılmış geniş müzakirələrə toxunulub və bu səfərin Aİ və Azərbaycan arasında dialoqun inkişafına mühüm töhfə verdiyi bildirilib.

Elmar Məmmədyarov Ermənistan-Azərbaycan, Dağlıq Qarabağ münaqişəsinin həlli üzrə aparılan danışıqlar prosesi barədə məlumat verərək münaqişənin tezliklə həlli və qəbuledilməz olan status- kvonun dəyişdirilməsi üçün BMT Təhlükəsizlik Şurasının qətnamələrinə uyğun olaraq Ermənistan qoşunlarının Azərbaycanın işğal olunmuş ərazilərindən çıxarılmalı olduğunu bildirib.

Görüşdə beynəlxalq gündəlikdə duran aktual məsələlər, Aİ-nin "Şərq tərəfdaşlığı" ölkələri ilə qarşıdan gələn zirvə toplantısı barəsində fikir mübadiləsi aparılıb. -03D-