Elmar Məmmədyarov: Danışıqları davam etdirməliyik və bu birmənalıdır

“Cəbhədəki axırıncı döyüşlərlə bağlı Azərbaycan Xarici İşlər Nazirliyi artıq öz mövqeyini bildirib. Erməni əsgərləri hücuma keçəndə Azərbaycan Ordusu onlara cavab verir”. Bu barədə Azərbaycan xarici işlər naziri Elmar Məmmədyarov Nideralndın xarici işlər naziri Frans Timmermansla görüşdən sonra keçirilən birgə mətbuat konfransında jurnalistlərin sualının cavabında bildirib.  

“Bəzi məqamlar var ki, təhlil edəndə görürsən ki, hər dəfə danışıqlar bir az irəli gedəndə belə döyüşlər daha aktiv xarakter alır. Bu isə o deməkdir ki, danışıqlara hansısa ziddiyyət gətirsin və ya hansısa problem yaratsın”. 

Nazir deyib ki, döyüşlər davam etdirilir və erməni tərəfi bir qayda olaraq susdurulur. “Buna baxmayaraq, biz düşünürük ki, danışıqları davam etdirməliyik və bu birmənalıdır”. 

Onun sözlərinə görə, Azərbaycan dünən və bu gün münaqişənin nizamlanması ilə bağlı ATƏT-in Minsk qrupunun həmsədrləri ilə müzakirələr aparıb. “Mən Kiyev və Paris görüşündən sonra açıqlamamda dediyim kimi, indi də deyirəm ki, biz daha konkret məsələləri müzakirə edirik. Artıq həmsədrlərə Azərbaycanın mövqeyini konkret şəkildə bildirmişik. Bu gün axşam həmsədrlər Yerevana gedəcək və Yerevanda danışıqları davam etdirəcəklər. Əgər Yerevanda hansısa bir nəticə olarsa, konkret məsələləri Ermənistan tərəfi qəbul edərsə, həm xarici işlər nazirləri, həm də prezidentlər səviyyəsində görüşlər ola bilər”.     

Nazir Azərbaycanın mövqeyinin birmənalı olduğunu diqqətə çatdırıb. “Biz danışıqları yalnız danışıqlar xatirinə aparmaq istəmirik və aparmayacağıq. Biz istəyirik ki, konkret məsələləri müzakirə edək və 2014-cü ildə hansısa bir irəliləyişə nail olaq. Mən yenə də Azərbaycanın mövqeyini təkrar etmək istəyirəm. Artıq hamı bilir, biz nəyin üzərində işləyirik. Ona görə də Azərbaycan tərəfi həmsədrlərə təklif verib ki, nə qədər tezliklə böyük sülh sazişinin üzərində işləməyə başlasaq, həm region, həm Ermənistan, həm Azərbaycan, həm də sadə insanlar üçün o qədər əlverişli və yaxşı olar”, deyə o qeyd edib. 

Nazir Məmmədyarov Ermənistan-Azərbaycan cəbhəsində durumun gərginləşməsində Rusiyanın maraqlı olması barədə Turan-ın sualının cavabında deyib ki, onda bu barədə məlumat yoxdur. “Siz deyirsiniz ki, orada Rusiya tərəfindən hansısa təxribata yol verilir, məndə bu məlumat yoxdur. Bəlkə orada onlar öz aralarında rusca danışırlar. Özünüz bilirsiniz ki, rus dilini həm Ermənistanda, həm Dağlıq Qarabağda, həm də Azərbaycanda bilən çoxdur”, deyə xarici işlər naziri bildirib. -03B-