Elmar Məmmədyarov: «Ermənistan danışıqlar prosesinin mahiyyətini təhrif edir»

Azərbaycan XİN rəhbəri  Elmar Məmmədyarov 2007-ci ildə ATƏT-in Minsk Qrupunun Qarabağ nizamlanması ilə bağlı təklif etdiyi “Madrid prinsipləri”nin qüvvədən düşməsi barədə erməni həmkarı Edvard Nalbandyanın bəyanatını  təkzib edib.

Ötən gün Nalbandyan bildirib ki, danışıqlar masası üzərində yalnız “Qazaxıstan prinsipləri” var, vasitəçilərin təklif etdiyi digər sənədlər,  “Madrid prinsipləri”  də daxil olmaqla, ATƏT-in arxivinə verilib.

Öz növbəsində E.Məmmədyarov erməni tərəfin danışıqlar prosesinin mahiyyətini təhrif etdiyini bildirib. 

“Danışıqlar prosesinin mahiyyətinin təhrif edilməsi və birtərəfli qaydada təqdim edilməsi cəhdləri Ermənistanın münaqişənin həllinə qeyri-ciddi və destruktiv yanaşmasının daha bir göstəricisidir”, - AzərTAC agentliyi E.Məmmədyarovdan sitat gətirib.

“ATƏT-in Minsk Qrupunun həmsədrləri tərəfindən münaqişə tərəfi olan Ermənistan və Azərbaycanın razılığı ilə ATƏT-in baş katibinin depozitarisinə təqdim olunan sənədin, bu xüsusda yenilənmiş “Madrid prinsipləri”nin qüvvədən düşdüyünü iddia etmək hər hansı məntiqə sığmır”, - nazir qeyd edib.

O bildirib ki, BMT Təhlükəsizlik Şurasının 822 (1993), 853 (1993), 874 (1993) və 884 (1993) saylı qətnamələrinin tələblərinə uyğun olaraq Ermənistan silahlı qüvvələri işğal olunmuş bütün Azərbaycan ərazilərindən tam və qeyd-şərtsiz çıxarılmalı, Azərbaycanın beynəlxalq səviyyədə tanınmış sərhədləri daxilində ərazi bütövlüyü və suverenliyi təmin edilməlidir. Bu prinsiplər əsasında münaqişənin həlli üzrə hərtərəfli siyasi prosesə başlamaq üçün Azərbaycan hazırlığını dəfələrlə ifadə edib.

Nazir deyib ki, Ermənistan rəhbərliyi öz işğalçı qoşunlarının nə qədər tez işğal olunmuş Azərbaycan ərazilərindən çıxarılmalı olduğunu dərk edərsə regionda sülh və sabitlik bir o qədər tez təmin oluna bilər.06D-