Aİ-Azərbaycan mobillik naminə tərəfdaşlıq

Aprelin  14-də Bakıda Azərbaycanla mobillik naminə tərəfdaşlığın həyata keçirilməsinə dəstək (MOBILAZE) layihəsinin təqdimatı keçirilib.

“Mobillik naminə tərəfdaşlıqlar 2005-ci ildən Aİ-nin xarici miqrasiya və sığınacaq siyasətinin ümumi çərçivəsi olan Miqrasiya və Mobillik üzrə Qlobal Yanaşma (GAMM) çərçivəsində Aİ və onun tərəfdaşları arasında ən təfsilatlı işlənib hazırlanmış əməkdaşlıq alətidir”, - Azərbaycan XİN sosial-humanitar məsələlər şöbəsinin rəis müavini Seymur Mərdəliyev bildirib.

Mobillik naminə tərəfdaşlıqlar mobillik, viza, sığınacaq, geri qayıdış və inteqrasiya məsələləri ilə bağlı tərəfdaş ölkələrə dialoq platforması təklif edir.

Azərbaycan, Aİ və onun iştirakçı üzv dövlətləri ilə mobillik naminə tərəfdaşlıq barədə birgə bəyannamə 2013-cü ilin dekabrında imzalanıb. Birgə bəyannamədə insanların yerdəyişməsinin mümkün qədər effektiv idarə edilməsi məqsədilə bir sıra siyasi məqsədlər təsbit edilib, Aİ və Azərbaycan arasında dialoqun daha da davam edəcəyi bir çox sahələr müəyyənləşdirilib.

MOBILAZE layihəsində məqsəd etibarlı miqrasiya idarəçiliyinə şərait yaratmaq üçün mobillik naminə tərəfdaşlığın iştirakçı ölkələri arasında birbaşa mübadilə yaratmaqdan ötrü real əsas və imkanlar təmin etməkdir.

Layihə həmçinin Azərbaycan hökumətinin miqrasiya sahəsindəki monitorinq, təhlil və proqnozlaşdırma potensialının artırılmasına, əmək miqrasiyası, sənədlərin təhlükəsizliyi, milli sığınacaq siyasəti sahəsində və geri qayıdan Azərbaycan vətəndaşlarının davamlı reinteqrasiyasını həyata keçirilməsində idarəçiliyin və potensialın gücləndirilməsinə, o cümlədən Aİ və Azərbaycan arasında mobilliyə dair ictimai məlumatlandırmaya yönəlib.

Təqdimatda  Xarici İşlər Nazirliyi, Dövlət Miqrasiya Xidməti, Dövlət Sərhəd Xidməti, Əmək və Əhalinin Sosial Müdafiəsi Nazirliyi, Təhsil Nazirliyi, Bakı Dövlət Universiteti, miqrasiya siyasətinin inkişafı üzrə Beynəlxalq Mərkəz - ICMPD (layihə komandası) və Aİ-nin Azərbaycandakı nümayəndəliyinin əməkdaşları  iştirak ediblər.

Layihənin başlanğıc mərhələsinin ilkin nəticələri təqdim olunub. Ehtiyacların, ekspertizanın müəyyənləşdirilməsi, texniki yardım və potensialların artırılması üzrə fəaliyyətlərin təmin edilməsi müzakirə olunub.

Aİ Azərbaycan nümayəndəliyinin rəhbəri Malena Mard qeyd edib ki, layihə miqrasiya sahəsində Aİ və Azərbaycanın mövqelərinin yaxınlaşmasına imkan verəcək ki, bu da indiki Avropa miqrasiya siyasəti şəraitində aktualdır.

Mard miqrasiya sahəsində uğurlu əməkdaşlıq kimi 2014-cü ildən viza rejiminin sadələşdirilməsi və readmissiya haqqında sazişi qeyd edib.

Aİ nümayəndəsi həmçinin bildirib ki, digər sahələrdə də - Aİ-Azərbaycan strateji tərəfdaşlığı haqqında, həmçinin bu il mayın 17-18-də Bakıda ikinci birgə biznes sammitinin keçirilməsi üzrə - əməkdaşlığın inkişafı haqda intensiv dialoq aparılır.-0—