Elmar Məmmədyarov: �Ermənistan prezidenti razılaşmanı pozub�

Bakı/18.10.17/Turan: Yaxın vaxtlarda Azərbaycan və Ermənistan XİN rəhbərləri Elmar Məmmədyarovla Edvard Nalbandyanın görüşü planlaşdırılır. Ancaq görüşün dəqiq vaxtı və yeri məlum deyil.

"Yaxın vaxtlarda XİN rəhbərlərinin görüşü planlaşdırılır. Hansı şəhərdə olacağı hələlik məlum deyil", - E.Məmmədyarov çərşənbə günü Bakıda Polşa XİN rəhbəri Vitold Vaşikovski ilə görüşündə bildirib.

O əlavə edib ki, Qarabağ münaqişəsinin nizamlanması üzrə danışıqlar "intensiv və substantiv" aparılmalıdır.

E.Məmmədyarovun sözlərinə görə, ATƏT-in Minsk Qrupu həmsədrlərinin bəzi təklifləri var. XİN rəhbərlərinin görüşündə əsas məqsəd predmetli müzakirələrin aparılmasıdır.

E.Məmmədyarov Ermənistan prezidenti Serj Sarqsyanın iki ölkə liderinin Cenevrə görüşünün yekunları ilə bağlı razılaşmanı pozduğunu qeyd edib.

Əsasən görüşün yekunları ilə bağlı birgə bəyanatla kifayətlənmək və bu çərçivədən kənara çıxmamaq qərara alınmışdı.

"Bu, prezidentlərin birgə bəyanatı idi. Serj Sarqsyanın məsuliyyətsiz şəkildə bu bəyanatın çərçivəsindən kənara çıxması düzgün deyil", - o vuğulayıb.

Xatırladaq ki, Ermənistan prezidenti danışıqlardan sonra İsveçrədə erməni diasporu ilə görüşündə bildirib ki, "yeganə həll odur ki, Qarabağ Azərbaycanın tərkibində olmasın". -06D--