Elmar Məmmədyarov Peru ilə əlaqələri möhkəmləndirir

Xarici işlər naziri Elmar Məmmədyarov Peruya rəsmi səfəri çərçivəsində bu ölkənin xarici işlər naziri  Rafael Roncagliolo ilə görüşüb. 

Azərbaycan Xarici İşlər Nazirliyinin mətbuat xidmətinin məlumatına görə, nazir Roncagliolo Qafqaz regionunun dinamik inkişaf edən ölkəsi olan Azərbaycanla əməkdaşlığın aparılmasında maraqlı olduğunu bildirib. Azərbaycanı Qafqaz regionunun “qapısı” adlandıran nazir ikitərəfli münasibətlərin genişləndirilməsi üçün müqavilə-hüquq bazasının yaradılmasının vacibliyini xüsusi vurğulayıb.  

Nazir Elmar Məmmədyarov Azərbaycanın Peru ilə əməkdaşlığın genişləndirilməsində maraqlı olduğunu bildirib. 

İki ölkə arasında siyasi səviyyədə əlaqələrin inkişaf etdirilməsinin iqtisadi sahədə əməkdaşlıq üçün möhkəm zəmin yaradacağını qeyd edən Elmar Məmmədyarov bunun üçün qarşılıqlı rəsmi səfərlərin davam etdirilməsinin, biznes forumların təşkil edilməsinin və mədəniyyət tədbirlərinin keçirilməsinin vacibliyini vurğulayıb. 

Məmmədarov Rafael Roncagliolonu Azərbaycana səfərə dəvət edib. Perulu nazir dəvəti məmnuniyyətlə qəbul edib.

Elmar Məmmədyarov səfəri çərçivəsində Perunun enerji və mədən naziri Jorge Merino ilə görüşüb. Görüşdə energetika sahəsində iki ölkə arasında əməkdaşlığın inkişaf etdirilməsi imkanları, bu sahədə məlumat və mütəxəssislərin mübadiləsi təklifi ətrafında fikir mübadiləsi aparılıb. -03D-