Elmar Məmmədyarov türkdilli ölkələri əməkdaşlığı genişləndirməyə çağırıb

Azərbaycan XİN rəhbəri Elmar Məmmədyarov türkdilli ölkələri çoxtərəfli əməkdaşlığın genişləndirilməsinə çağırıb. 

Avqustun 15-də Qəbələdə keçirilən türkdilli ölkələrin XİN rəhbərləri Şurasının iclasında E.Məmmədyarov qarşılıqlı ticarət və investisiyaların genişləndirilməsinin, birgə müəssisələrin  və layihələrin yaradılmasının vacibliyini qeyd edib.

O həmçinin BMT-nin mühüm telekommunikasiya layihəsini - TASIM ( Trans-Eurasian Information Super Highway) dəstəklədiyini xatırladıb və əmin olduğunu bildirib ki, türkdilli ölkələr Avrasiya Kommunikasiya İttifaqını təsis edəcəklər.

E.Məmmədyarov türkdilli ölkələrin Parlament Assambleyası, Türksoy kimi qurumlarının fəaliyyətə başlamasını alqışlayıb və ümidvar olduğunu bildirib ki, yaxınlarda Türk Mədəni İrsi Fondu da fəaliyyətə başlayacaq.

Eyni zamanda o, regional əməkdaşlığın inkişafına mane olan amilləri də qeyd edib – aqressiv separatizm, milli və etnik zəmində münaqişələr, beynəlxalq aləmdə tanınmış sərhədlərin zorla dəyişdirilməsi addımları.

O, Azərbaycanın ərazi bütövlüyünü dəstəklədiklərinə görə iştirakçı ölkələrə təşəkkürünü bildirib.

Türkdilli ölkələrin XİN rəhbərləri Şurasının iclası avqustun 16-da açılacaq dövlət başçılarının sammiti ilə əlaqədardır.  

Türkiyə prezidenti Abdulla Gül artıq Qəbələyə gəlib.—06D-