Əlövsət Sadıxlı sərbəst buraxılıb (YENİLƏNİB)

 Əlövsət Sadıqlı bəraətverici əsaslarla məhkəmənin qərarı ilə azadlığa buraxılıb.

Lakin onun oğlu, Elgiz Sadıqlının məhkəmə prosesi davam etdirilir.

2015 Fevral 14 (Şəmbə) 14:01:03

Müsavat Partiyasının keçmiş üzvü Əlövsət Sadıxlı və oğlu Elgiz Sadıqov fevralın 13-də saxlanıb. Elgiz Sadıqova qarşı narkotik ittihamı irəli sürülüb. 

Əlövsət Sadıqlının Almaniyada mühacirətdə olan digər oğlu Tural Sadıqlı facebook səhifəsində atasının və qardaşının saxlnamasına müasibət bildirib. 

“Atam Əlövsət Əhədoğlu polisə müqavimət, qardasım Elgiz Sadıqov narkotik ittihamı ilə şərlənərək, həbs olunub. Dostlar, mənim əlim çatmır. Kimin imkanı varsa, Sabuncu rayon polisinə getsin, məsələdən xəbərdar olsun!”

Öz növbəsində, Daxili İşlər Nazirliyinin mətbuat xidməti Turan agentliyinə Elgiz Sadıqlının konkret cinayət əməlinə görə həbs edildiyini bildirib.

“Elgiz Sadıqov Sabunçu rayon Polis İdarəsinin əməkdaşları tərəfindən saxlanmasına bəzi media vasitələrində siyasi rəng verilməsi təəssüf doğurur. Elgiz Sadıqov törətdiyi konkret cinayət əməlinə görə saxlanılıb. Belə ki, Sabunçu rayon Polis İdarəsinin əməkdaşlarının keçirdiyi əməliyyat-axtarış tədbirləri nəticəsində ondan 5,32 qram narkotik vasitə olan marixuana götürülüb. Elgiz Sadıqova məxsus Mersedes markalı avtomobilə baxış zamanı oradan əlavə olaraq külli miqdarda - 1 kioqram 505 qram marixuana aşkar edilərək götürülüb. Əsl həqiqət budur”, deyə Daxili İşlər Nazirliyinin mətbuat xidməti rəisinin müavini Ehsan Zahidov Turan-a bildirib.

Sabunçu rayon Polis İdarəsində fakt üzrə Cinayət Məcəlləsinin müvafiq maddələri ilə cinayət işi qaldırlıb.

Vəkil Yavər Hüseyn Turan-a bildirib ki, hazırda Əlövsət Sadıqlı Sabunçu rayon Məhkəməsinə gətirilib.

Müsavat Partiyası Əlövsət Sadıqlı və oğlu Elgiz Sadıqlının ictimai müdafiəsini təşkil edəcək. “Əlövsət Sadıqlı Müsavat Partiyasından xaric edilib. Biz onun və oğlunun müdafiəsini təşkil edəcəyik”, deyə Müsavat Partiyası mərkəzi icra aparatının rəhbəri Gülağa Aslanlı Turan-a bildirib.

Əlövsət Sadıqlının oğlu Tural Sadıqlı Almaniyada siyasi mühacirətdədir. Tural Sadıqlı facebook səhifəsində yanvarın 11-də yazıb ki, “21 yanvarda İlham Əliyevin Berlində Almaniyanın kansleri Merkellə görüşü zamanı kansleratın qarşısında keçirdiyimiz etiraz aksiyasına görə indi burdakı bəzi dostlarımızın Bakıdakı yaxınlarını incitməyə başlayıblar”. -03B-