Elvin Abdullayev: Həbsim diktator üzərində qələbədir

Ağır Cinayətlərə dair İşlər Üzrə Məhkəmədə keçirilən bugünki prosesdə məhkəmə gənc fəal, AXCP üzvü Elvin Abdullayevi narkotik saxlamaq ittihamı ilə 6 il müddətinə azadlıqdan məhrum edib.

Hökm çıxarılmazdan əvvəl Abdullayev son sözlə çıxış edib. O bildirib ki, özünü təqsirli bilmir, həbsi isə sifarişdir.

“Həbsim diktator üzərində qələbədir, mən şadam ki, qalib və siyasi məhbus oldum. Özümü ona görə qalib hesab edirəm ki, diktator rejimi məndən qorxur.

Üç ton heroinin ticarətini həyata keçirən hakimiyyət məni üç qram heroinə görə mühakimə edir. Vaxt gələcək, bu rejimi buradaca mühakimə edəcəklər”, deyə Elvin Abdullayev bildirib.

Lakin hakim Fikrət Qəribov onun sözünü kəsib, ittihamın mahiyyəti üzrə danışmağı tələb edib. Öz növbəsində, hakimin iradı zalda etirazlara səbəb olub.

“Məni gəncləri qorxutmaq məqsədilə həbs ediblər. Lakin bunun əks effekti olub. Əsl cinayətkar hakimiyyətdir. Hakimiyyət nə qədər istəməsə də, Azərbaycanda inqilab baş verəcək”, deyə Elvin Abdullayev qeyd edib. Onun çıxışı zalda gurultulu alqışlarla qarşılanıb.

Öz növbəsində, zalda olan AXCP sədri Əli Kərimli bildirib ki, Elvin və onun anası Zülfiyyə xanım kimi insanlar olmasaydı, millət məhv olardı. Ölkədə əsl repressiya aparılır, deyə Kərimli qeyd edib. -03B04-