Erdoğan ermənilərə başsağlığı verib

Türkiyənin baş naziri Recep Tayyip Erdoğan aprelin 23-də parlamentin iclasnda ilk dəfə ermənilərə 20-ci əsrin əvvəllərində Osmanlı İmperiyasında baş vermiş hadisələrlə bağlı başsağlığı verib.

RİA Novosti-nin yaydığı məlumata görə, Erdoğan deyib: “Eyni mürəkkəb, amma nadir coğrafiyaya məxsus bənzər adət-ənənələrə malik, qədim xalqların öz keçmişini və itkilərini layiqli şəkildə yada sala biləcəyinə ümid edərək və inanaraq, XX əsrin əvvəllərində baş vermiş hadisələrdə həlak olan ermənilərin ruhlarının şad olmasını diləyirik, onların nəvələrinə isə başsağlığı veririk”.

Erdoğanın sözlərinə görə, 24 aprel ermənilər üçün xüsusi gündür. “Ölkəmizin və bütün dünya erməniləri üçün xüsusi əhəmiyyət daşıyan gün tarixi hadisələrlə bağlı azad fikir mübadiləsi üçün dəyərli imkandır. İnkar etmək olmaz ki, Osmanlı İmperiyasının mövcudluğunun son illərində dini və etnik mənsubiyyətindən asılı olmayaraq, imperiyanın milyonlarla türk, kürd, ərəb, erməni və digər vətəndaşları üçün acı hadisələrlə dolu çətin dövr idi”, deyə Erdoğan qeyd edib.

O, həmçinin bildirib ki, bu hadisələrdən Türkiyəyə qarşı istifadə oluna bilməz. Türkiyə və Ermənistan tarixçiləri 1915-ci il hadisələrinin araşdırılması üçün birgə komissiya yaratmalıdır və yalnız birgə araşdırma 1915-ci il hadisələrinə obyektiv qiymət verə bilər, deyə o bildirib. -02D-