Ərdoğan Zelenskiyə Putinlə görüşməyi təklif edəcək

Bakı/18.08.22/Turan: Bu gün Lvovda Ukrayna və Türkiyə prezidentləri Vladimir Zelenski və Rəcəb Tayyib Ərdoğan, həmçinin Birləşmiş Millətlər Təşkilatının baş katibi Antoniu Quterreş arasında üçtərəfli danışıqlar olacaq.

Ukraynaya səfəri zamanı Ərdoğan ukraynalı həmkarı Vladimir Zelenskiyə Kremlin rəhbəri Vladimir Putinlə görüş təşkil etməyi təklif edəcək, UNİAN Türkiyə mənbələrinə istinadən bildirib.

“Ərdoğanın Zelenskiyə Putinlə görüş təşkil etməyi təklif edəcəyi gözlənilir”, - A Haber telekanalının müxbiri Lvovdan diplomatik dairələrdəki mənbələrə istinadən bildirib.

Türkiyənin digər xəbər kanalı CNN Türk əlavə edib ki, Zelenski və Putin Ukraynada müharibə məsələsi üzrə “yol xəritəsi”ni müəyyən etmək üçün görüşə bilərlər.

"Rusiya mənbələrindən aldığımız xəbərlərə görə, Rusiya prezidenti Vladimir Putin Vladimir Zelenski ilə görüşə bilər. Rusiya tərəfi bildirib ki, liderlər “yol xəritəsi”ni müzakirə və müəyyən edə bilər. Bundan sonra nümayəndə heyətləri bu “yol xəritəsi”nin həyata keçirilməsi üçün işə başlaya bilərlər”. – məlumatda deyilir.

UNİAN bildirib ki, avqustun 17-də hərbi ekspert Oleq Jdanov deyib ki, Türkiyə prezidenti Rəcəb Tayyib Ərdoğan və Birləşmiş Millətlər Təşkilatının baş katibi Antoniu Quterreş Vladimir Zelenski ilə görüşdə Rusiya Federasiyası ilə müharibənin diplomatik yolla başa çatmasını irəli sürəcəklər, lakin bu, Rusiyanın planıdır - danışıqlar masasına indi oturmaq.—0 —