Ərdoğanın oğli istintaqa çağırılıb, deputatlar Ərdoğanı tənqid ediblər

Türkiyə mətbuatı prokuror Müəmmər Akkaşın  korrupsiya və rüşvət iddiası ilə baş nazir Ərdoğanın oğlu Bilal Ərdoğanı şübhəli qismində ifadə verməyə çağırdığını yazır. 

Prokuror B.Ərdoğana könüllü gəlmək istəmədiyi halda zorla gətiriləcəyi barədə xəbərdarlıq etməyi də unutmayıb. Baş nazir R.T.Ərdoğan isə oğlunun ifadə verməyə çağırılmasına “belə üsullarla mənə çıxmaq istəyirlər” münasibətini ifadə edib.    

Hakim partiyadan olan deputat Həsən Hami İldırım araşdırma dosyesinin prokuror M.Akkaşdan alınması cəhdlərinə təpki göstərib. Deputat bu addımı “hökumətə etimadı sarsıdacaq addım, hüquq dövlətinə yaraşmayan hərəkət” kimi dəyərləndirib.

Partiyanı tənqidə məruz qoyan digər deputat Erdal Kalkan isə intizam cəzası verilməsinə cavab olaraq partiyadan istefa verib. “Mən bu partiyaya əsgəri müdaxilə başladığı zaman daxil olmuşam. Ərdoğandan öncə mövqe qoymuşam. Siyasi partiyalar demokratik rejimin zəruri ünsürüdür. Siyasi partiyalar kiminsə, xüsusilə Ərdoğanın babasının mirası deyil, milyonlarca insanın yaratdığı sosial varlıqlardır. Hökumət, iqtidar, partiya intizamı korrupsiya, hüquqsuzluq, oğurluq və soyğunçuluğu əngəlləmək üçündür. Bu iş burada bitməz. Xalq hər şeyi görür, hakim xalq olsun, qurtuluş savaşı vermiş xalq bunu da həll edər”-deyə deputat partiya rəhbərliyinə mövqeyini sərt şəkildə çatdırıb.-05D-