Ermənilər Azərbaycan HHQ uçuş aparatına hücum ediblər

Bakı/13.06.19/Turan: Azərbaycan Müdafiə Nazirliyi iyunun 12-də səhər cəbhənin cənub-şərq istiqamətində hücum barədə məlumat verib.

"İyunun 12-də səhər saatlarında cəbhənin Füzuli istiqamətində Azərbaycan Hərbi Hava Qüvvələrinin aviasiya vasitələrinin planlı təlim uçuşları həyata keçirilib.

Bu zaman Ermənistan Silahlı Qüvvələri "OSA" zenit-raket kompleksini tətbiq etməklə aviasiya vasitələrimizi vurmağa cəhd göstərib. Zenit-raket kompleksindən buraxılan 2 ədəd raket hədəfə dəyməyərək havada partlayb", - Azərbaycan Müdafiə Nazirliyinin məlumatında deyilir.

Raketlər Azərbaycan Silahlı Qüvvələri pilotsuz uçuş aparatı tərəfindən qeydə alınıb.

Öz növbəsində Ermənistan KİV bu ölkənin müdafiə naziri David Tonoyana istinad edərək dünən və bu gün sərhəddə vəziyyətin nisbətən sakit olduğunu bildirib.

Azərbaycanın pilotsuz uçuş aparatlarının aktivləşməsi barədə sualın cavabında Tonoyan deyib: "Bizim pilotsuz uçuş aparatları da bütün perimetr boyunca uçur".

Xatrladaq ki, ötən gün erməni təəfi bəyanat yayaraq Azərbaycanı təmas xəttində təmkinli olmağa çağırıb. -06D-