Ermənistan Avropa və İran arasında köprü olmağa can atır

Bakı/30.01.19/Turan: Yanvarın 29-da Avropa İttifaqının genişlənmə məsələləri üzrə komissarı Yohannes Han Yerevana gedib. Baş nazir Nikol Paşinyanla görüş zamanı əsasən infrastruktur, təhsil və energetika sahələrində iqtisadi əməkdaşlığın genişləndirilməsi məsələlərini müzakirə edib.

Lragir-in məlumatına görə, Aİ "Şərq tərəfdaşlığı" çərçivəsində 10 il ərzində infrastrukturun inkişafı məqsədilə Ermənistana 800 mln. avro ayırıb. Bu vəsait İran və Gürcüstanı Ermənistan vasitəsilə birləşdirən Şimal-Cənub yolunun tikintisinə sərf olunacaq.

Həmin gün İranın energetika nazirinin müavini də Ermənistana gedib. Görüş zamanı "elektrik enerjisinin müqabilində qaz" proqramının genişləndirilməsi imkanları və üçüncü yüksək voltlu Ermənistan-İran xəttinin çəkilişi müzakirə olunub.

Həmin gün N.Paşinyan RBK-ya müsahibəsində bildirib ki, Ermənistan tranzit boru kəmərinin çəkilişində maraqlıdır.

Görünür, bu hərəkətlər Moskvanın diqqətindən kənarda qalmayıb və Rusiyanın xarici işlər nazirinin müavini Qriqori Karasin də yanvarın 29-30-da Yerevanda olub. Rəsmi məlumata görə, o, Ermənistan rəhbərliyilə AİB və KTMT çərçivəsində ticarət-iqtisadi məsələləri müzakirə edib. "Dağlıq Qarabağ nizamlanması da daxil olmaqla, Zaqafqaziyada təhlükəsizlik və sabitlik mövzusuna xüsusi diqqət yetirilib", - RF XİN bildirib.

Qeyd edək ki, N.Paşinyan Almaniyaya rəsmi səfərə gedib və Angela Merkel ilə danışıqlar aparacaq-02D-