Ermənistan Baş Qərargahı Paşinyanın istefasını tələb edib, baş nazir isə dövlət çevrilişi cəhdindən danışıb

Yerevan/25.02.21/Turan: Ermənistan baş naziri Nikol Paşinyan Ermənistan SQ Baş Qərargahının bəyanatını hərbi çevriliş cəhdi hesab edir. Bu barədə o, öz Facebook səhifəsində yazıb.

“Bütün tərəfdarlarımızı elə indicə Respublika Meydanına dəvət edirəm. Bir azdan canlı efirdə müraciətlə çıxış edəcəyəm”, deyə o yazıb.

Bir müddət əvvəl Ermənistan SQ Baş Qərargahı baş nazir Nikol Paşinyanın istefasını tələb edən bəyanat yayıb.

Baş Qərargah rəisi Onik Qasparyanın, onun bütün müavinlərinin, bütün idarə rəislərinin və böyük hərbi birliklərin komandirlərinin imzaladığı bəyanatda deyilir ki, Baş Qərargah uzaqgörənlikdən uzaq və əsassız addımlara, xüsusən Baş Qərargah rəisinin birinci müavininin vəzifədən azad edilməsinə qəti etirazını bildirir.

Sənəddə qeyd edilir ki, Ermənistan baş naziri və hökuməti hazırki taleyüklü böhran dövründə artıq adekvat qərarlar qəbul etmək iqtidarında deyil.

“Ermənistan silahlı qüvvələri uzun müddət hazırki hakimiyyətin orduya qarşı hücumlarına səbr edib, amma hər şeyin həddi-hüdudu var. Ermənistan silahlı qüvvələri öz vəzifəsini şərəflə yerinə yetirib, xalqla çiyin-çiyinə düşmənə qarşı döyüşüb. Hazırki hakimiyyətin səmərəsiz idarəetməsi və xarici siyasətdə ciddi səhvləri ölkəni məhv olma həddinə gətirib çıxarıb”, deyə bəyanatda bildirilir.

Yaranmış vəziyyətdən irəli gələrək, silahlı qüvvələr baş nazirin və hökumətin istefasını tələb edir, eyni zamanda övladları Vətəni müdafiə edərkən həlak olmuş xalqa qarşı güc tətbiq etməkdən çəkindirir. Ordu həmişə xalqın yanında, xalq da ordunun yanında olub, deyə müəlliflər qeyd edirlər. -02D-