Ermənistan "bir ay ərzində" Azərbaycanla sülh müqaviləsini bağlamağa hazırdır - A.Mirzoyan

Azərbaycanla sülh müqaviləsi layihəsinin mətni, demək olar ki, yekunlaşıb, bu barədə Ermənistanın xarici işlər naziri Ararat Mirzoyan bildirib.

"Biz bu məsələ ilə bağlı Azərbaycanla danışıqlara cəlb olunmuşduq və Ermənistan bir ay ərzində mətni tamamilə yekunlaşdırmağa və Azərbaycanla sülh müqaviləsini bağlamağa hazırdır", deyə o, cümə axşamı Tallində Estoniyanın xarici işlər naziri Marqus Tsaxkna ilə birgə mətbuat konfransında bildirib.

Mirzoyan qeyd edib ki, "azərbaycanlı həmkarları tərəfindən Ermənistanın sülh müqaviləsini bir ay ərzində imzalamaq təklifinə müsbət reaksiya" görmür. 

"Lakin Ermənistan sülh gündəliyinə, Azərbaycanla münasibətlərin normallaşmasına, 1991-ci il Alma-Atı Bəyannaməsi əsasında hər iki ölkənin ərazi bütövlüyünün tanınmasına, bu bəyannamə əsasında delimitasiya prosesinin davam etdirilməsinə sadiq olaraq qalır", deyə "Novosti-Armenia" Mirzoyandan sitat gətirir.

Onun sözlərinə görə, "Cənubi Qafqazda münaqişə səhifəsini bağlamağın və bu regiona sülhü gətirməyin vaxtı çatıb".

"Şübhəsiz, biz bu istiqamətdə işi davam etdirəcəyik və Cənubi Qafqaz regionunda uzunmüddətli sülhdə və sabitlikdə maraqlı olan tərəfdaşlarımızın güclü dəstəyinə ümid edirik", deyə Mirzoyan bildirib.