Ermənistan mərhələli nizamlanmanı və Qarabağın Azərbaycana qaytarılmasını mümkün hesab etmir

Ermənistan prezidenti Qarabağın Azərbaycanın tərkibinə qaytarılmasının mümkünlüyünü rədd edir. O, ərəb telekanalı Əl-Mayadeen- nə müsahibəsində deyib ki, Qarabağ sakinləri hansı statusu istədiklərini özləri həll etməlidir – müstəqil dövlət və ya Ermənistana birləşmək.

“Təhlükəsizlik yalnız Azərbaycanın sərhədlərinin xaricində təmin oluna bilər. Heç kimin şübhəsi yoxdur ki, Qarabağ bir gün belə Azərbaycanın tərkibində olarsa orada bir erməni qalmaz. Odur ki, ən vacib olan Qarabağın Azərbaycanın tərkibində olmamasıdır”,  - o vurğulayıb.

“Əgər bütün dünya Qarabağ sakinlərini Azərbaycanın tərkibində yaşamağa razı salmağa çalışsa da qarabağlılar razı olmazlar. Onları məhv etmək olar, ancaq Azərbaycanın tərkibində yaşamağa razı salmaq mümkün deyil”, - o qeyd edib.

Öz növbəsində Qarabağ separatçılarının lideri David Babayan Qarabağ münaqişəsinin mərhələli həllinin mümkünlüyünü inkar edib.

“Biz dəfələrlə qeyd etmişik ki, Qarabağ münaqişəsinin hərtərəfli nizamlanmasına, yəni paket həllinə tərəfdarıq. Ancaq Bakı daim mərhələli həllə təkid edir. Belə olan halda, birinci mərhələdə Bakı Dağlıq Qarabağın müstəqilliyini tanımalıdır”, - Babayan Qarabağ münaqişəsinin yeganə həlli yolunun mərhələli nizamlanma olması barədə prezident İlham Əliyevin bəyanatını şərh edərkən deyib. -02D-