Ermənistan prezidenti Azərbaycanı cəzalandıracağı ilə hədələyir

“Azərbaycanın cinayətkar rejimi getdikcə insanlığa qarşı daha çox cinayət bataqlığına batır”, - Ermənistan prezidenti Serj Sarqsyan şənbə günü Yerevanda 4 erməni hərbçinin və 3 dinc sakinin ölümünü şərh edərkən bildirib.

“Sivil dünyanın qanunu bəşəriyyəti insanlığa qarşı cəzasız cinayətlərə son qoymağa çağırır. Ermənistan bu məsələdə qətiyyətlidir. Biz ardıcıl olaraq bu cür cinayətlərdə təqsirkar olan hər kəsi – belə əmri icra edən sıravi əsgərdən tutmuş bu əmri verən komandanlığa qədər hər kəsi aşkar edib  təqib edəcəyik. Əgər alternativ olmasa demək ki, bu cür cinayətlərin icraçılarına qarşı cəza qılıncı məhz biz olacağıq”, - o vurğulayıb.

Qarabağı “Ermənistanın ayrılmaz hissəsi” adlandıran Sarqsyan “cəza tədbirləri” ilə hədələyib.

“Biz Azərbaycan hökumətini öz xalqına yeni bəlalar gətirdiyinə görə onun qarşısında hesabat verməyə məcbur edəcəyik”, - o bildirib.

Öz növbəsində Ermənistan Müdafiə Nazirliyi bəyanatla çıxış edərək Azərbaycana qarşı artilleriya və raketlərdən istifadə edəcəyilə hədələyib. Buna səbəb kimi sentyabrın 25-də Qarabağın şimalında Azərbaycanın raket və artilleriyadan istifadə etməsi olub.

Erməni qüvvələri bundan sonra düşmənin qarşısını almaq üçün Azərbaycan Silahlı Qüvvələrinin dislokasiya yerlərinə artilleriya və raket zərbələri endirəcəklər, məlumatda deyilir.-02D-