Ermənistan Xarici İşlər Nazirliyi: Rusiya Ermənistan-Azərbaycan nizamlanmasında qeyri-konstruktiv rol oynayır

Rəsmi Yerevan Ermənistan və Azərbaycan arasında münasibətlərin nizamlanması prosesində Rusiyanın konstruktiv roluna şübhə ilə yanaşır. Bu barədə Ermənistan Xarici İşlər Nazirliyinin nümayəndəsi Ermənistanın Sünik vasitəsilə kommunikasiyaların açılması barədə razılaşmanı sabotaj etməsilə bağlı Rusiya xarici işlər naziri Sergey Lavrovun bəyanatından sonra bildirib.

Ermənistan Xarici İşlər Nazirliyinin mətbuat katibi Ani Bədəlyan Lavrovun sözlərini şərh edərkən təəssüflə qeyd edib ki, "Rusiya Xarici İşlər Nazirliyinin müxtəlif rəsmi şəxslərinin Ermənistana qarşı həqiqətə uyğun olmayan, açıq-aydın qərəzli şərhləri yeni deyil" və çoxdandır Yerevan onlara reaksiya vermir.

Lakin Lavrovun bəyanatı "təkcə açıq təəssüf doğurmur, həm də Rusiya Federasiyasının Ermənistanla Azərbaycan arasında münasibətlərin nizamlanması prosesində konstruktiv iştirakını şübhə altına alır", - Bədəlyan deyib.

Ermənistan Xarici İşlər Nazirliyinin nümayəndəsi qeyd edib ki, məhz "Dünyanın kəsişməsi" layihəsi regional kommunikasiyaların açılmasına yönəlib, onların bloklanmasına yox.

"Rusiya Xarici İşlər Nazirliyindən olan həmkarlarımızı onun reallaşmasını sabotaj etməməyə və qərəzli bəyanatlarla Cənubi Qafqazda sülhə nail olmaq səylərini pozmamağa çağırırıq", -  o vurğulayıb.

Xatırladaq ki, avqustun 19-da Bakıda Sergey Lavrov bildirib ki, Ermənistan rəhbərliyi Sünik vilayəti  vasitəsilə (Zəngəzur dəhlizi nəzərdə tutulur-Turan) kommunikasiyaların açılması barədə razılaşmanı "sabotaj edir".