Exxon AÇG-dəki payını satmaq istəyir

London/05.12.18/Turan: Amerikanın neft-qaz nəhəngi Exxon Mobil Azərbaycanın ən böyük neft yataqları blokunun işlənməsi layihəsindəki payını satmaq istəyir, belə ki, qlobal əməliyyatlarının orientasiyasını dəyişdirir, bu barədə bank-mənbələr məlumat verib.

Mənbələrin məlumatına görə, Exxon Xəzər dənizində Azəri-Çıraq-Günəşli (AÇG) yataqlarının işlənməsi layihəsində 6,8%-lik payının satışından 2 milyard dollar əldə etməyə ümid edir. Exxon Mobil-in rəsmi nümayəndəsi Culi King bildirib ki, şirkət "bazar şaiyələrini və uydurmaları" şərh etmir. Azərbaycan Dövlət Neft Şirkətinin (SOCAR) nümayəndəsi bildirib ki, məlumatı şərh etməyəcək, belə ki, o, Exxon-la bağlıdır.

Blokun operatoru Britaniyanın neft nəhəngi BP olsa da, layihə ABŞ hökumətindən böyük dəstək alıb. Əvvəlcə layihədə Amerikanın beş şirkəti - Exxon, Amoco, Unocal, Pennzoil və McDermott iştirak edirdi.

BP Exxon-un planları haqqında məlumata malik olmadığını bildirib.

Yeni böyük yataqların açılması ümidləri doğrulmadıqdan sonra Amerika şirkətlərinin əksəriyyəti layihədən çıxıb, həmçinin, ABŞ hökumətinin dəstəyi azalıb.

Exxon gedərsə, Chevron layihədə 9,57% payla yeganə Amerika şirkəti olacaqdı. Amma korporasiya çərşənbə axşamı bildirib ki, AÇG-dəki paylarının satışı prosesini başlatmaq qərarı qəbul edib.

BP və SOCAR-a müvafiq olaraq 30,4% və 25% pay məxsusdur.

Konsorsiumun digər iştirakçıları arasında 9,3% payla Yaponiyanın İnpex şirkəti və 7,3% payla Norveçin Equinor şirkəti var. Türkiyənin TPAO, Yaponiyanın İtochu və Hindistanın ONGC Videsh şirkətləri daha az paylara malikdir.

Azəri-Çıraq-Günəşli neft yataqları Xəzər dənizinin Azərbaycan sektorunda ən böyük yataqlardır, ölkənin neft gəlirlərinin böyük hissəsini təmin edir. -02D-