Eynulla Fatullayev hesabat verdi

“İnsan Haqları” Uğrunda ictimai birliyinin rəhbəri, hüquq müdafiəçisi  Eynulla Fətullayev çərşənbə axşamı öz ofisində keçirdiyi mətbuat konfransını Almaniya Xarici İşlər Nazirliyini və Amnesty İnternational qurumunu tənqid və ittihamlar üstündə qurub.

E.Fətullayev Almaniya Xarici İşlər Nazirliyini və Amnesty İnterantional təşkilatını Almaniyada insan haqlarının durumuna dair aparılan tədqiqatın nəticələri ilə bağlı yanvarın 19-da Brüsseldə keçirilən konfransı pozmaq cəhdində ittiham edib. 

Birlik Almaniyada insan haqlarının pozulması ilə bağlı tədqiqat aparıb və bu duruma tənqidi münasibət sərgiləyib. E.Fətullayev tədqiqat başa çatdıqdan Almaniya hökumətinin bundan narahat olduğunu, bu tədqiqatla bağlı Brüsseldə keçiriləcək tədbirdə çıxış edəcək spikerlərə təzyiqlər edildiyini deyib. Amnesty İnternational təşkilatının “İnsan Haqları Uğrunda” birliyilə əməkdaşlıqdan imtina etməsini Almaniya hökumətinin təzyiqilə bağlı olduğunu iddia edib. Onun dediyinə görə, rəsmi Berlin tənqid hədəfi kimi Almaniyanın seçilməsindən narahat olub. Bu layihəni kimin maliyyələşdirməsilə maraqlanıb. 

E.Fətullayev cavabında ayrı-ayrı qurumların adını çəkərək, faktiki layihənin maliyyələşdirilməsi haqda Almaniya tərəfin sorğularına yalan cavablar verib. Həm də “İnsan Haqları Uğrunda” birliyinin 2012-ci il üçün büdcəsinin 200 min manatdan çox olduğunu deyən E.Fətullayev belə layihəni reallaşdırmağın onlar üçün çətin olmadığını söyləyib. Belə layihənin reallaşdırılmasına 10 min avro vəsaitin yetərli olduğunu deyib. Mətbuat konfransında isə E.Fətullayev layihəni Almaniyanın türk icmasının maliyyələşdirdiyini, bunun üçün 30 min avro vəsait ayrıldığını bildirib.  

Amnesty İnternational təşkilatının “İnsan Haqları Uğrunda” birliyilə əməkdaşlıqdan imtina etməsi, ikinci dəfə həbsə düşdüyü halda hüquq müdafiəçisini müdafiə etməyəcəyi bəyanatına E.Fətullayev kəskin cavab verib. “Tüpürüm sizin demokratiyanıza, mənə belə müdafiə lazım deyil”, - deyə hüquq müdafiəçisi beyənlxalq hüquq müdafiə təşkilatını təhqirə məruz qoyub. 

E.Fətullayev adı çəkilən konfransın Brüsseldə keçirildiyini, 470-dən çox mətbu orqan və telekanalın, o cümlədən Almaniya mətbuatı və elektron KİV-lərinin bu konfrans haqda informasiya verdiklərini deyib. Əgər belə isə, E.Fətullayev Almaniya hökumətinin hansı təzyiqindən danışır, məlum deyil. Üstəlik, E.Fətullayev Almaniya kanslerinə müraciət edərək onun bu təzyiqlərə aydınlıq gətirməsi zərurətini qeyd edib.

Tədbirə qatılan Almaniyanın Azərbaycan səfirliyinin əməkdaşı Hanki Almaniyanın insan haqları və ifadə azadlığına yüksək önəm verdiyini deyib. O, bu layihə icraçılarının öz hökumətlərilə əməkdaşlıq etməsi şübhələrinin yaranmasına diqqət çəkib. Diplomat faktiki E.Fətullayevi rəsmi Bakının tapşırığını yerinə yetirməkdə ittiham edib. Bundan sonra E.Fətullayev diplomatı mətbuat konfransını pozmaqda ittiham edərək, danışmasına imkan verməyib. -05C-