Famil Xəlilov polislərin ifadələrini təkzib edib

Çərşənbə günü Bakı Ağır Cinayətlər Məhkəməsində birinci qrup əlil Famil Xəlilovun məhkəməsi davam edib. O, narkotik maddələrin qanunsuz dövriyyəsində ittiham olunur.

Çıxış edən şahidlər – polislər  Ağaməmməd Nəzirov və Vüsal Bayramov bildiriblər ki, Xəlilovu Sulu Təpə qəsəbəsində evinin yaxınlığındakı küçədə saxlayıblar.  Guya əməliyyatçılar Xəlilovun şortunun sağ cibində metamfetamin paketi aşkar ediblər.

Müttəhim bildirib ki, paket ona aid deyil, onun şortunun cibləri tikilib, buna görə orada narkotik maddə tapa bilməzlər. Əlil əlləri iflic olduğuna görə ciblərindən istifadə etmir.

Xəlilov onu da deyib ki, küçədə tək qala bilməz, çünki birinci qrup əlildir və küçəyə tək çıxmır, onu həmişə yaxın adamı müşayiət edir. "Tək çıxsam, tarazlığımı itirirəm və yıxılıram", - müttəhim  deyib.

O, küçədə saxlanması barədə fikirləri inkar edərək bildirib ki, onu evdən çıxarıb polisə aparıblar. Xəlilov həmçinin qeyd edib ki, onunla bağlı  axtarışlar  foto və video çəkiliş olmadan aparılıb. Onun yanına seçim üzrə vəkil buraxılmayıb.

Şahidlərin dinləmələri dekabrın 12-nə planlaşdırılan növbəti məhkəmə iclasında davam edəcək.

Xatırladaq ki, Famil Xəlilov mayın 2-də külli miqdarda narkotik maddənin hazırlanması, daşınması ittihamı ilə "qanunsuz həbs edildiyinə" etiraz olaraq avqustun 15-dən aclıq elan edib. Onu 12 ilə qədər həbs təhlükəsi gözləyir.

Onun yaxınları bildiriblər ki, Famil sosial şəbəkələrdə fəal olub və insan hüquqlarına əməl olunmasını tələb edib, hakimiyyətin siyasətini tənqid edib. Onun həbsinin səbəbi məhz budur.

Famil Xəlilov serebral iflicdən əziyyət çəkir, əlləri iflicdir. Sosial şəbəkələrdəki yazılarını ayaq barmaqları ilə yazıb. Hüquq müdafiəçiləri onu siyasi məhbus kimi tanıyıblar.