Fazil Mustafa hüquq-mühafizə orqanlarının hospitalına köçürülüb  /YENİLƏNİB/

Bakı/29.03.23/Turan: Dünən silahlı hücuma məruz qalan deputat Fazil Mustafanın vəziyyəti yaxşıdır. Bu barədə Turana deputatın köməkçisi Əjdər Əliyev məlumat verib.
Onun sözlərinə görə, dünənki cərrahi əməliyyatından sonra F.Mustafa özünü yaxşı hiss edir. Təhlükəsizliyin təmin edilməsi məqsədilə Mustafa hüquq-mühafizə orqanlarından birinin hospitalına köçürülüb, deyə öz növbəsində TƏBİB-dən bildiriblər. 06D

*   *   *

2023 Mart 29 (Çərşənbə) 02:01:25

Dövlət Təhlükəısizliyi Xidməti Milli Məclisin deputatına qarşı silahlı hücumun terror aktı olduğunu bildirib   /YENİLƏNİB/

Bakı/29.03.23/Turan: Dövlət Təhlükəsizliyi Xidməti Milli Məclisin deputatı Fazil Mustafaya qarşı silahl hücumun terror aktı olduğunu bildirib. 

Dövlət Təhlükəsizliyi Xidmətinin Mətbuat xidmətinin məlumatında deyilir ki, martın 28-də Bakı vaxtı ilə saat 21:51-də Azərbaycan Milli Məclisinin deputatı Mustafa Fazil Qəzənfər oğluna yaşadığı evin qarşısında - Bakı şəhəri, Sabunçu rayonu, Zabrat-1 qəsəbəsi, Babək küçəsi ev 2 “Z” ünvanında “Kalaşnikov” konstruksiyalı avtomat silahından atəş açılaraq terror aktı törədilib. 

“Terror aktı nəticəsində Fazil Mustafa bədənin sağ çiyin qurşağını və sağ budun aşağı üçdə birini dəlib keçən güllə yarası almışdır. Ona zəruri tibbi xidmətlər göstərilir və vəziyyəti stabil olaraq qiymətləndirilir. Həyati təhlükəsi yoxdur. Faktla bağlı Azərbaycan Respublikası Dövlət Təhlükəsizliyi Xidmətinin İstintaq baş idarəsində Cinayət Məcəlləsinin 277 (dövlət xadiminin və ya ictimai xadimin xidməti və ya siyasi fəaliyyətinə son qoymaq və ya bu fəaliyyətə görə qisas almaq məqsədilə onun həyatına sui-qəsd etmə) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini, döyüş sursatı əldə etmə, saxlama, daşıma və gəzdirmə) maddələri ilə cinayət işi başlanılmışdır.

Terror aktını törətmiş şəxsin və cinayət hadisəsi ilə əlaqəsi olan digər şəxslərin müəyyən olunaraq cinayət məsuliyyətinə cəlb olunması istiqamətində kompleks təxirəsalınmaz əməliyyat-istintaq tədbirləri həyata keçirilir”, məlumatda qeyd edilir.-03-

*   *   *

2023 Mart 28 (Çərşənbə axşamı) 23:22:12

Fazil Mustafanın həyati təhlükəsi yoxdurn - TƏBİB /YENİLƏNİB/

Bakı/28.03.23/Turan: Deputat Fazil Mustafa yaşadığı evin yaxınlığında naməlum şəxs və ya şəxslər tərəfindən güllələnib.

Bunu Turana Daxili İşlər Nazirliyinin mətbuat xidmətindən bildirilib.

Qeyd olunub ki, hadisə yerinə əməliyyət-istintaq qrupu cəlb edilib. Hadisənin törətməkdə şübhəli bilinən şəxs axtarılır.

Əlavə olunub ki, deputatın vəziyyəti qənaətbəxşdir.

Baş Prokurorluğun Mətbuat xidmətinin məlumatında isə bildilir: «Milli Məclisin deputatı Fazil Mustafanın paytaxtın Sabunçu rayonunda yaşadığı evin qarşısında odlu silahdan açılmış atəş nəticəsində xəsarət alması faktı ilə bağlı cinayət işi başlanıb.

Hazırda Baş prokurorun birinci müavini, Bakı şəhər prokuroru və istintaq-əməliyyat qrupu hadisə yerindədir.

TƏBİB-in tabeliyindəki Bakı Şəhəri Təcili və Təxirəsalınmaz Tibbi Yardım Stansiyasına Milli Məclisin deputatı Fazil Mustafanın xəsarət alması barədə saat 21:55 radələrində çağırış daxil olub, dərhal həkim briqadası cəlb edilib.

Sağ çiynin, sağ budun yuxarı üçdə birinin güllə yarası diaqnozu ilə hazırda ona zəruri tibbi xidmətlərin göstərilməsi davam edir. Vəziyyəti stabil olaraq qiymətləndirilir. Həyati təhlükəsi yoxdur.-

Deputat Bakı Şəhəri Təcili və Təxirəsalınmaz Tibbi Yardım Stansiyasına gətirilib və hazırda əməliyyat olunub, həyati üçün təhlükə yoxdir.-0-

*   *   *

2023 Mart 28 (Çərşənbə axşamı) 22:35:36

Deputat Fazil Mustafaya silahlı hücum olub

Bakı/28.03.23/Turan: Deputat Fazil Mustafaya Zabratda yerləşən yaşadığı evinin qarşısında silahlı hücum olub.

Turana məlumatı hüquq-mühafizə orqanlarından təsdiqləyiblər.

Məlumata görə, deputat çiynindən və ayağından güllə yarası alıb. Vəziyyəti barədə məlumat hələlik verilmir.-0-