Fazil Qasımov İstintaq Təcridxanasında 26 gündür aclıq edir

1 saylı Bakı İstintaq Təcridxanasında saxlanılan İstanbul Universitetinin doktorantı Fazil Qasımov 26 gündür aclığı davam etdirir. O, iyunun 14-də həbsinə etiraz olaraq aclığa başladığını bəyan edib və bu gün yenidən aclığı sonadək davam etdirəcəyini bildirib.

Bu barədə Turan-a iyulun 9-da onunla görüşdən sonra qardaşı Nazim Qasımov deyib.

"Fazillə şüşə arxasından telefonla danışdım. Qardaşım o qədər çəki itirib ki, sanki bədəni quruyub. Səsi eşidilməz dərəcədə zəifdir. Bir saat öncə həkim təzyiqini ölçüb, arterial təzyiqi 65/40 nisbətində olub. Mədəsi xəstə olduğu halda dərman da qəbul etmir. Hazırda təcridxanada ümumi kamerada saxlanılır", deyə o qeyd edib.

Nazim Qasımov ictimaiyyəti qardaşını ölümdən xilas etməyə çağırıb.

"Bizim ailə istənilən qurumu, istənilən şəxsi, həmçinin beynəlxalq təşkilatları, o cümlədən Beynəlxalq Qızıl Xaç Komitəsini qardaşımı ölümün pəncəsindən almaq üçün kömək etməyə çağırır. Bundan öncə Azərbaycan Prezidentinin Administrasiyasına, baş prokurora, daxili işlər nazirinə müraciət edərək qardaşımın azadlığa çıxması üçün kömək etmələrini xahiş etmişik. Onlardan bir reaksiya yoxdur. Yalnız yazırlar ki, məktubunuz çatıb", deyə Nazim Qasımov bildirib.

Məhkəmələr vəkillərin Qasımov barədə həbs qətimkan tədbirinin ev dustaqlığı tədbiri ilə əvəz edilməsi barədə vəsatətlərini təmin etməyib.

Qasımovun vəkilləri onunla bağlı Ombudsmana, Penitensiar Xidmətə və Ədliyyyə Nazirliyinə müraciət edib.

Fazil Qasımov Qafqaz Universitetini bitirib (2017-ci il yanvarın 16-da fəaliyyətini dayandırıb), sonra Türkiyədə oxuyub, daha sonra İstanbul Universitetinin doktoranturasını bitirib.

Türkiyədə yaşayan iqtisadçı alim Qasımov 2023-cü il avqustun 8-də İstanbulda tutularaq Azərbaycana gətirilib. Fazil Qasımov Qubad İbadoğluna qarşı qaldırılmış cinayət işinin istintaqı çərçivəsində saxlanılıb və Cinayət Məcəlləsinin 204.3.1-ci (satış məqsədi ilə hazırlama, o cümlədən saxta pul və ya xarici valyuta əldə etmə və ya satma - eyni əməllər mütəşəkkil dəstə tərəfindən törədildikdə) maddəsi ilə ittiham olunur.