Fəal Rza Səfərsoy hakimə etiraz edib

Fəal Rza Səfərsoy qanunsuz silah dövriyyəsi ittihamını qəbul etməyib. Məhkəmənin hazırlıq iclasında o, Azərbaycan hakimiyyətini tənqid etdiyinə görə siyasi sifarişlə həbs olunduğunu bildirib.

Aprelin 15-də Bakının Xəzər Rayon Məhkəməsində Səfərsoyun işi üzrə hazırlıq iclası başlayıb. Fəal bildirib ki, istintaqın iddiasına görə, onun mənzilində tapılan TT markalı tapançanı mənzilə polis əməkdaşları qoyub. 

Səfərsoyun sözlərinə görə, 23 noyabr 2023-cü il tarixində polis əməkdaşları onun evinə gəlib və axtarış aparıb. "Mən evdən çıxarkən bizə mülki geyimli maskalı polis əməkdaşları gəldi. Həyat yoldaşımı zorla evdən çıxardılar və üç saat öz maşınlarında girov saxladılar. Mənim əllərimi bağladılar və otaqda kilidlədilər. Nəzarətsiz şəkildə evdə gəzirdilər, tapançanı döşəyin altına qoyublar, sonra isə "tapıblar"", deyə Səfərsoy bildirib.

O, hakim Hüseyn Hüseynliyə etiraz edib. Səfərsoy bunu ibtidai istintaq zamanı hakimin Səfərsoyun vəkilinin vəsatətlərinə və şikayətlərinə baxması və heç birini təmin etməməsi ilə əsaslandırıb. Səfərsoyun sözlərinə görə, o, hakimiyyəti kəskin tənqid etdiyinə görə saxta ittihamla həbs olunub.

Vəkil Nazim Musayev etirazı dəstəkləyib. "Məhkəmənin icazəsi olmadan heç kimin evinə girib axtarış aparmaq olmaz. Noyabrın 23-də polis əməkdaşları Rza Səfərsoya qarşı belə hərəkət ediblər. Ertəsi gün qanunsuz əməllərini gizlətmək üçün Rza Səfərsoydan zorla axtarış aparılmasına etirazı olmadığı haqqında ifadə alıblar.

Biz məhkəməyə bu əməliyyat-axtarış tədbirinin qanunsuz olduğu haqqında şikayət verdik. Lakin bu hakim (Hüseyn Hüseynli), açıq-aşkar yol verilmiş pozuntulara baxmayaraq, axtarışın "qanuni" olduğu haqqında qərar qəbul edib", deyə vəkil bildirib.

Hakimə etirazla əlaqədar fasilə elan edilib, növbəti iclas aprelin 19-na təyin edilib. Həmin vaxta qədər Xəzər Rayon Məhkəməsinin sədri etirazı nəzərdən keçirəcək.

Səfərsoy Birinci Qarabağ müharibəsinin veteranıdır. 2018-ci ildə o, Gəncə şəhərində kütləvi həbsləri tənqid etdikdən sonra artıq qanunsuz silah dövriyyəsi ittihamı ilə həbs olunub. Həmin vaxt o, 2 il müddətinə azadlıqdan məhrum edilib. 7 ay sonra Apellyasiya Məhkəməsi cəza müddətini azaldaraq onu azad edib.

Bu dəfə o, sosial şəbəkələrdə Abzas Media rəhbərlərinin həbsini kəskin tənqid etdikdən və vətəndaşları etirazlara çağırdıqdan sonra həbs olunub.