![Fəalın cəzaçəkmə müəssisəsində fiziki zorakılığa məruz qaldığı bildirilir](https://turan.az/resized/news/2024/Js2PacHwtrmpoyhdAkfz02jrzRrt5gdDn3gIMGbD-750-500-resize.webp)
Fəalın cəzaçəkmə müəssisəsində fiziki zorakılığa məruz qaldığı bildirilir
Fəalın cəzaçəkmə müəssisəsində fiziki zorakılığa məruz qaldığı bildirilir
İşçi Masası Həmkarlar İttifaqları Konfederasiyasının İdarə Heyətinin üzvü Ayxan İsrafilovun cəzaçəkmə müəssisəsində təzyiqə məruz qaldığı bildirilir.
Fəalın anası Əminə İsrafilova Turan-a bildirib ki, oğlu Umbakı təcridxanasında saxlanılırdı və Bakı Apellyasiya Məhkəməsinin qərarından sonra iyunun 29-da cəzaçəkmə müəssisəsinə köçürülüb: "Amma bizim onu hansı cəzaçəkmə müəssisəsinə apardıqları barədə məlumatımız olmayıb. Penitensiar Xidmətdən maraqlandıq, bizə demədilər. Ombudsman Aparatından bizə Ayxanın 17 saylı cəzaçəkmə müəssisəsində karantində olduğunu dedilər".
Əminə İsrafilovanın sözlərinə görə, iki həftə keçməsinə baxmayaq, oğlu ilə əlaqə saxlaya bilməyib: "Dünən 17 saylı cəzaçəkmə müəssisəsinə getdik, sənədlərimizi verdik, 1 saat qəbulu gözlədik, axırda dedilər ki, orada yoxdur. Oradan yaxında olan 2 saylı cəzaçəkmə müəssisəsinə getdik. Həmin prosedurdan yenidən keçəndən sonra dedilər ki, orada da yoxdur. Axırda 10 saylı cəzaçəkmə müəssisəsindən dedilər ki, buradadır, görüşə icazə verdilər", deyə o qeyd edib.
Fəalın anası bildirib ki, İsrafilov çəki itirib, səhhəti yaxşı deyil: "Dedi ki, cəzaçəkmə müəssisəsinə köçürüləndə əşyalarının yoxlanışı zamanı dərmanlarını görüblər. Ayxan deyib ki, "2-ci qrup əliləm, ağrıkəsici dərmanlarımdır". Dərmanları əlindən almaq istəyəndə, Ayxan etiraz edib. Ona görə onu şillə və yumruqla döyüb karsa salıblar. Karsda ona çirkli paltar veriblər. Yemək də o qədər keyfiyyətsiz idi ki, 14 günə cəmi 4 yumurta yeyib. Başağrısından əziyyət çəkəndə dərman istəyib, onu da verməyiblər", deyə ana oğluna istinadən bildirib.
İsrafilova oğlunun hələ də karsda saxlanıldığını deyib.
O, məsələ ilə bağlı aidiyəti qurumlara müraciət edəcəyini bildirib.
Məsələ ilə bağlı Penitensiar Xidmətdən münasibət öyrənmək mümkün olmayıb.
Siyasət
-
Sentyabrın 1-də keçiriləcək növbədənkənar parlament seçkilərində namizəd olmaq üçün 119 seçki dairəsi üzrə 431 nəfər müraciət edib.
-
"1 saylı Bakı İstintaq Təcridxanasında saxlanılan Toplum TV-nin təsisçisi Ələsgər Məmmədlinin kəskin baş ağrıları 3 gündür davam edir, həzm prosesi düzgün getmir, mədə rahatsızlıqları var". Bu barədə Məmmədlinin həyat yoldaşı Günay Məmmədli iyulun 15-də onunla telefon danışığından sonra bildirib.
-
1 saylı Bakı İstintaq Təcridxanasında saxlanılan İstanbul Universitetinin doktorantı Fazil Qasımov 31 gündür aclığı davam etdirir. O, yalnız su qəbul edir. Bu barədə iyulun 15-də onunla görüşdən sonra vəkil Rövşanə Rəhimli bildirib.
-
Azərbaycan prezidenti İlham Əliyevin sərəncamı ilə Səyyad Salahlı (Aran) və Siyavuş Heydərov Dini Qurumlarla İş üzrə Dövlət Komitəsi (DQİDK) sədrinin müavini vəzifəsindən azad edilib.
Rəy yaz