Fəhlələrə kompensasiya veriləcək

Bakı/17.01.20/Turan: Azərbaycan Dövlət Neft Şirkətinin nəzdində olduğunu bildirilən Üstay şirkətin işçiləri yanvarın 16-da etiraz aksiyasını keçirib. Yüzə yaxın işçi Sumqayıtda Etilen-Polietilen zavodunun ərazisində yerləşən Üstay şirkətin ofisin qarşısında toplaşıb. 

Şirkətdə çalışanların sözlərinə görə, aksiyaya səbəb işçilərin təzminatını verilməməsidir. Onlar təzminat verilməyənə qədər tətil edəcəyini bəyan ediblər.

SOCAR-ın İctimaiyyətlə əlaqələr və tədbirlərin təşkili İdarəsindən Turana bildirilib ki, Türkiyənin "Üstay” şirkəti "Azərikimya” İstehsalat Birliyinin Etilen-Polietilen zavodunun modernizasiya layihəsində çalışır və SOCAR-ın nəzdində deyil. "Bu şirkət podratçı şirkətdir. Aksiya iştirakçılara gəlincə, bu, zavodda çalışmış və müqavilə bitmiş şəxslərdir. Qaydaya görə, onlara kompensasiya verilməməlidir, amma buna baxmayaraq, "Üstay” şirkəti onlara əlavə ödəniş edəcək". 

SOCAR-dan vurğulanıb ki, Dövlət Neft Şirkəti bir qayda olaraq, bütün tərəfdaş şirkətlərdən tələb edir ki, Azərbaycan vətəndaşlarının bütün hüquqları məhz ölkənin qanunvericiliyi əsasında yüksək səviyyədə təmin olunsun. "Hazırda bu istiqamətdə şirkətlər arasında hər hansı fikir ayrılığı yoxdur”.

"Üstay" şirkətindən Turana bildirilib ki, etiraz edən şəxslərin müqavilə müddəti bitib və onlara kompensasiya verilməməlidir. "Şirkət müqaviləyə müddətdən əvvəl xitam verdikdə işçilərə kompensasiya verilir. Müqavilənin müddəti başa çatdıqda isə kompensasiya verilmir. Lakin şirkətimiz etiraz edən şəxslərə əlavə ödəniş verilməsi ilə bağlı qərara gəldi". -0-