Fərəc Kərimlinin məhkəməsi başa çatır

Bakı Ağır Cinayətlər Məhkəməsində Müsavat Partiyası sədrinin müavini Fərəc Kərimlinin işi üzrə məhkəmə istintaqı başa çatıb. O, narkotik maddələrin qanunsuz dövriyyəsində ittiham olunur.

Otən gün F.Quliyev ifadə verərək öz həbsinin siyasi motivli olduğunu bildirib.

O qeyd edib ki, 18 ildir ki, Müsavat Partiyasnın üzvüdür, atası Raqif Kərimli isə uzun müddət partiya rayon təşkilatının sədri olub.

F.Kərimli sosial şəbəkələrdə iş üzrə məsul şəxs, musavat.org.az saytının və Facebook-da musavat.сom səhifəsinin administratoru olub.  

“İnternetdə  sosial şəbəkələrdə hakim rejimin korrupsiyasına dair məlumatlar yayırdıq, gənclərə və siyasi fəallara qarşı repressiyalar haqda bilgi verirdik”, - F.Kərimli qeyd edib.

O həmçinin DİN Baş Mütəşəkkil Cinayətkarlığa Qarşı Mübarizə İdarəsində mənəvi təzyiqlərə məruz qaldığını bildirib. Onu atasının həbs olunacağı və xəstəxanada olan anasının öldürüləcəyi ilə hədələyiblər.

Ondan Müsavat Partiyasının qarşıdakı qurultayı, təşkilatın liderləri İsa Qəmbər və Arif Hacılı barəsində soruşulub.

Sonda F.Kərimli bildirib ki, narkotik maddəni onun üzərinə qoyublar. Həbsinin əsl səbəbi Müsavat Partiyasında və sosial şəbəkələrdə siyasi fəaliyyəti ilə bağlıdır.

F.Kərimlinin çıxışından sonra hakim Şəkər Məmmədova məhkəmə istintaqının başa çatdığını bildirib.

Növbəti iclas aprelin 29-na təyin edilib. İclasda prokuror çıxış edəcək.

Sirac və Fərəc Kərimli qardaşları 2014-cü ilin iyulun 17 və 23-də həbs olunublar.

2014-cü il avqustun 18-də Amnesty International beynəlxalq hüquq-müdafiə təşkilatı onları “vicdan məhbusları” elan edib.

Martın 12-də məhkəmə S.Kərimlini 6 il müddətinə azadlıqdan məhrum edib.—06D-