Fevralda Azərbaycan və Aİ arasında danışıqlar başlayır

Yaxın vaxtlarda Avropa İttifaqı və Azərbaycan arasında tərəfdaşlıq haqqında saziş üzə danışıqlar başlayacaq.

Turan-a diplomatik mənbələrdən məlum olub ki, danışıqlar fevralda başlaya bilər.

2016-cı ilin noyabrında Avropa İttifaqı (Aİ) Şurası danışıqların başlanması üçün mandat verib. Hazırda tərəflər nümayəndə heyətinin tərkibini formalaşdırır.

Mənbə Turan-a bildirib ki, saziş ticarət-iqtisadi məsələlərdən başlamış insan hüquqları və demokratik prinsiplərə əməl olunması məsələlərini əhatə edəcək.

Adətən Aİ “asandan mürəkkəbə doğru” prinsipi üzrə danışıqlar aparır.

Öncə tərəflər asan razılığa gəlinən məsələləri müzakirəe edərək saziş bağlayacaqlar. Aİ-nin danışıqlarda prinsipi belədir: “ya hər şey, ya heç nə”.

Belə ki, əgər tərəflər bir bənd üzrə razılığa gəlməsələr sənəd imzalanmayacaq.

Danışıqlara başlanması Brüsseldə hər iki tərəfdən yüksək vəzifəli şəxslərin iştirakı ilə keçiriləcək tədbirdə elan ediləcək.

Hazırda Aİ və Azərbaycan arasında münasibətlər 20 il öncə imzalanmış və 17 il öncə qüvvəyə minmiş tərəfdaşlıq və əməkdaşlıq haqqında saziş çərçicəsində tənzimlənir.

Yeni saziş tərəfdaşlıq və əməkdaşlıq haqqında sazişi əvəzləyəcək.–71D-