Finlandiya NATO-ya daxil olub, növbədə İsveç var

Vaşinqton/04.03.23/Turan: Bu gün Türkiyə və Finlandiya Brüsseldə Finlandiyanın NATO-ya daxil olması haqqında ratifikasiya fərmanının əsllərini ABŞ dövlət katibi Entoni Blinkenə təqdim edəcəklər, bu da bu Skandinaviya ölkəsinin Alyansa daxil olması prosesini başa çatdıracaq. Xəbəri TURAN-ın Vaşinqtondakı müxbiri verib.  

"Biz mərasimi burada, Brüsseldə qeyd edəcəyik... Və bu, müttəfiqlər üçün bir araya gəlmək və qeyd etmək üçün əsas fürsət olacaq", deyə ABŞ-ın NATO-dakı daimi nümayəndəsi Culianna Smit Turan-ın müxbiri ilə söhbətində bildirib. 

Xüsusi brifinqdə İsveçin Alyansa daxil olması ehtimalı haqqında suala cavabda səfir Smit deyib ki, prosesi Türkiyə və Macarıstan ləngidib.

Ankaranın narahatlığı terrorçuluq problemi ilə bağlıdır. "Finlandiya Türkiyənin irəli sürdüyü bəzi narahatlıqları aradan qaldırıb və hesab edirəm ki, yaxın gələcəkdə İsveçlə bağlı da bunu görəcəyik, odur ki, biz kifayət qədər nikbinik", deyə o bildirib.

Macarıstana gəlincə, o, "hər iki namizəd ölkə ilə danışıqlar aparır" və "biz bu ölkələri dialoqa və qarşılıqlı fəaliyyətə çağırırıq", deyə o bildirib.

Ukrayna və Rusiyanın Donbasa hücumu haqqında suala cavabda səfir Smit deyib ki, "aydındır ki", ruslar heç bir böyük qələbə əldə edə bilməyiblər. "Görək daha sonra nə olur, biz ukraynalıların yaxın həftələrdə hücuma başlayacaqlarını gözləyirik", deyə o qeyd edib. 0