FLMMM: Bakıda ləzgi təşkilatının liderlərinin qohumları saxlanılıb

Azərbaycanın hüquq-mühafizə orqanları Rusiyanın Federal Ləzgi Milli-Mədəni Muxtariyyətinin (FLMMM) liderləri Arif Kərimovun və muxtariyyətin icra komitəsinin sədri Amil Sarkarovun qohumlarını saxlayıb. Bu barədə FLMMM Şurasının bəyanatında bildirilir. Ümumilikdə 3 nəfər saxlanılıb, onlardan ikisi RF vətəndaşıdır.

Saxlanılanlardan biri - Azərbaycan vətəndaşı Eldar Məmmədov Arif Kərimovun qaynıdır.

Bəyanatda deyilir ki, Məmmədov Oğuzda Azərbaycan DİN-in Narkotiklərə qarşı Mübarizə İdarəsinin əməkdaşları tərəfindən “oğurlanıb” və Bakıya gətirilib.

Rusiya vətəndaşı Cavid Babayev Arif Kərimovun qohumu, Tariel Sarkarov isə Amil Sarkarovun doğma qardaşıdır.

Cavid Babayev avqustun 6-da qohumlarına baş çəkmək üçün gəldiyi Bakıda saxlanılıb. 

Sarkarov avqustun 9-da atasının qəbrini ziyarət etmək üçün anası ilə birlikdə gəldiyi Qəbələ rayonunun Qameravan kəndində saxlanılıb.

Maraqlıdır ki, bu həbslər Rusiya prezidenti Vladimir Putinin Bakıya səfəri ərəfəsində baş verib, deyə FLMMM-nin bəyanatında qeyd edilir.

Nə RF səfirliyi, nə Azərbaycan DİN hələlik sözügedən şəsxlərin saxlanılması ilə bağlı şərh vermir.

Qeyd edək ki, son vaxtlar FLMMM Dərbənddə Heydər Əliyevin abidəsinin quraşdırılmasına etiraz edib və Azərbaycanda ləzgilərin hüquqlarının pozulması haqqında bəyanatlarla çıxış edib. -06D-