Fransa səfirliyi milli bayram münasibətilə təntənəli qəbul keçirib

Bakı/13.07.19/Turan: Cümə günü axşam Fransanın Bakıdakı səfirliyi iyulun 14-də qeyd olunan milli bayram - Bastiliyanın alınması günü münasibətilə təntənəli qəbul təşkil edib.

Səfir Oreliya Buşe giriş nitqində bu günün Fransa tarixindəki əhəmiyyətini və ölkənin demokratik inkişafındakı rolunu qeyd edib.

İkitərəfli münasibətlərə toxunan səfir bu əlaqələrin möhkəmləndiyini vurğulayıb, yüksək səviyyədə qarşılıqlı səfərlərin əməkdaşlığın inkişafına töhfə verdiyini qeyd edib.

O, siyasi dialoqun daha da möhkəmləndirilməsinin vacibliyini qeyd edib.

A.Buşe Xəzər regionunda sülhün və təhlükəsizliyin təminatında Azərbaycanın əhəmiyyətini vurğulayıb. Səfir Avropa və Asiyanın birləşdirilməsi üçün "Cənub" qaz dəhlizi və Bakl-Tbilisi-Qars dəmir yolu layihələrinin böyük əhəmiyyətini qeyd edib.

Səfir Fransanın 70 şirkətinin rəhbərinin iştirakı ilə işgüzar dairələrin nümayəndə heyətlərinin bu həftə Azərbaycana səfərini iki ölkə arasındakı iqtisadi əlaqələrin inkişafına nümunə göstərib.

Fransa Sahibkarlar Təşkilatı Biznes Şurasının (MEDEF) prezidenti Jofrua Ru de Beziönün rəhbərliyilə nümayəndə heyətinin səfəri Fransa şirkətlərinin Azərbaycana marağının artdığını göstərir.

Parlamentlərarası əlaqələr də inkişaf edir. Fransa Milli Assambleyası Fransa-Qafqaz dostluq qrupunun üzvləri sentyabrda Azərbaycana gələcəklər.

Azərbaycan hökumətinin adından xarici işlər nazirinin müavini Xələf Xələfov çıxış edib.

O xatırladıb ki, Fransa Azərbaycanın müstəqilliyini tanıyan ilk ölkələrdən biridir.

O deyib ki, Azərbaycanla Fransanı sıx dostluq əlaqələri bağlayır. İki dövlət arasında aktiv siyasi dialoq aparılır.

Son illər iki ölkə arasında humanitar əlaqələr inkişaf edib.

İqtisadiyyat, elm, təhsil və mədəniyyət sahəsində əməkdaşlığın inkişafı üzrə səylər real nəticələr verir.

Xələf Xələfov ümidvar olduğunu bildirib ki, ATƏT-in Minsk Qrupunun həmsədri olan Fransa Qarabağ münaqişəsinin beynəlxalq hüquq normaları əsasında nizamlanması üçün səylərini artıracaq.06D--