Fransa səfirliyinin qadınlara qarşı gender zorakılığının əleyhinə tədbiri

Bakı/09.12.21/Turan: Dekabrın 8-də Fransanın Azərbaycandakı səfirliyində qadınlara qarşı gender zorakılığının əleyhinə tədbir keçirilib.

Tədbirdə çıxış edən Fransanın Azərbaycandakı səfiri Zaxari Qross deyib ki, qadınlar hələ də psixoloji və fiziki zorakılıqla, iqtisadi bərabərsizlik və məhdudiyyətlərlə üzləşirlər.

"Bu sahədə irəliləyişə nail olmaq üçün gender bərabərsizliyi probleminin mövcud olduğunu etiraf etməliyik. Zorakılıq qurbanları olan qadınların şikayətləri polis orqanları və ya işəgötürənlər tərəfindən qəbul edilməlidir. Qadınlar  əmin olmalıdırlar ki, onların sözü eşidiləcək, məhkəmə sistemi effektiv olmalıdır. Bu məsələ ilə bağlı statistik məlumatlar lazımi şəkildə toplanmalı və dərc olunmalıdır", - səfir deyib.

Sonra o, iki azərbaycanlı qadını təqdim edib.

Şəhla İsmayıl çətin vəziyyətlərdə qadınlara yardım edir, Günel Ağabəyli isə qadınlara elmə qapı açmaqda kömək edir.

“Onlar həm də özləri ilə fəxr etməli və əmin olmalıdırlar ki, istedadlarının tam şəkildə reallaşa biləcəyi bərabərhüquqlu və inklüziv cəmiyyətdə yaşayacaqlar", - Gross davam edib.

Şəhla İsmayıl Rasional İnkişaf Uğrunda Qadınlar cəmiyyətinə rəhbərlik edir. Onun sözlərinə görə, Azərbaycanda gender zorakılığı ilə mübarizə sahəsində müəyyən işlər görülüb, lakin bu, yetərli deyil.

"Hazırda Azərbaycanın regionlarında vəziyyət Bakıda olduğundan daha çətindir. Qadınlara qarşı zorakılıq, onların hüquqlarının pozulması adi hala çevrilir. Qadınlara qarşı ayrı-seçkilik müxtəlif səviyyələrdə - fərdi, icma səviyyəsində özünü göstərir”, - fəal deyib. -16D-