Fransanın Azərbaycana qoyduğu investisiyaların həcmi 2,4 mlrd. dollara çatıb

ATƏT-in Minsk Qrupunun həmsədri olan Fransa Azərbaycan və Ermənistan prezidentlərinin görüşünü təşkil etməyə hazırdır. Bu barədə Fransanın Azərbaycandakı səfiri Aureliya Buşez iyulun 14-də ölkənin milli bayramı – Bastiliyanın alınması günü münasibətilə keçirilən təntənəli qəbulda bildirib.

O, Azərbaycan və Fransa arasında ikitərəfli dialoqun  intensiv inkişafını, iqtisadi əlaqələrin genişləndiyini qeyd edib.

Bu münasibətlər müxtəlif sahələri – energetika, ticarət, nəqliyyat, yüksək texnologiyalar, kosmik araşdırmalar, ekologiya, mədəniyyət,  incəsənəti və s. əhatə edir.

Fransa ölkə iqtisadiyyatının diversifikasiyasını dəstəkləyir.

Səfir qeyd edib ki, Fransa Azərbaycanda tolerantlığı və multikulturalizm ənənəsini qiymətləndirir.

Buşez Azərbaycanda fransız dilinə və mədəniyyətinə böyük marağın olduğunu alqışlayıb. Bu konteksdə o, ölkədə 500 fransız dili müəlliminin çalışdığına diqqəti yönəldib.

Bakıda fransız litseyi fəaliyyət göstərir, payızda isə birgə universitet açılacaq.

Öz növbəsində Azərbaycan iqtisadiyyat nazirinin müavini Sahil  Babayev bildirib ki, Bakı Fransa ilə əlaqələri yüksək qiymətləndirir.

Fransa Azərbaycanın əsas iqtisadi tərəfdaşlarından biridir. Ölkədə 44 Fransa şirkəti fəaliyyət göstərir. İki ölkə arasında əmtəə dövriyyəsi  1 mlrd. dollar təşkil edir. Azərbaycana Fransa investisiyalarının ümumi həcmi 2,4 mlrd. dollar təşkil edir.

S.Babayev iki ölkə regionları arasında əməkdaşlığın inkişafını qeyd edib.-06C--