Fransua Ollandın Bakıya səfəri (YENİLƏNİB)

Bu gün səhər saatlarında Azərbaycan və Fransa prezidentləri İlham Əliyev və Fransua Olland arasında danışıqlar olub

Dövlət başçıları ikitərəfli münasibətlərin hazırki vəziyyətindən məmnunluq ifadə ediblər, xəbəri Azərbaycan prezidentinin saytı yayıb.

Qeyd edilib ki, son illər dövlət başçılarının qarşılıqlı səfərləri ikitərəfli əlaqələrin daha dərin inkişafına təkan verib.

Söhbət zamanı Qarabağ münaqişəsinin tənzimlənməsi üzrə danışıqlardakı vəziyyət haqqında geniş fikir mübadiləsi aparılıb.

Görüşdə həmçinin regional və beynəlxalq həyat məsələləri, habelə qarşılıqlı maraq doğuran digər mövzular müzakirə olunub.

Dövlət başçıları həmçinin prezidentin həyat yoldaşı Mehriban Əliyevanın da iştirak etdiyi masa arxasında söhbət ediblər.

Daha sonra prezidentlərin iştirakı ilə Bakıda Fransa Universitetinin yaradılması üzrə niyyət protokolu imzalanıb. Sənədi Azərbaycanın təhsil naziri və Fransanın Bakıdakı səfiri imzalayıblar.

Xatırladaq ki, aprelin 24-də axşam Fransua Olland Yerevandan, İlham Əliyev isə İstanbuldan Bakıya gəlib. -06D-

2015 Aprel 24 (Cümə) 22:56:09

Aprelin 24-də axşam saatlarında Fransa prezidenti Fransua Olland Azerbaydcana işküzar səfərlə gəlib.

Hava limanında Ollandı Azərbaycanın baş nazirinin müavini Elçin Əfəndiyev və xarici işlər nazirinin müavini Xələf Xələfov qarşılayıblar.

Aprelin 25-də səhər prezident İlham Əliyev ilə  görüşdükdən sonra Olland Azərbaycanı tərk edəcək.-0-