Fuad Ağayev: Söhbət ondan gedir ki, prezidentin fəaliyyətini təmin edən orqanın adı dəyişdirilir

“Dövlət qulluğu haqqında” qanuna təklif edilən dəyişikliyin hansı məqsəd daşımasının detallarına layihə müəllifləri aydınlıq gətirə bilər”.

“Dövlət qulluğu haqqında” qanuna təklif edilən, bu gün parlamentdə birinci oxunuşda qəbul edilən dəyişiklikləri şərh edən hüquqşunas Fuad Ağayev belə deyib.

O, vurğulayıb ki, Azərbaycanın dövlət başçısının fəaliyyətini bilavasitə təmin etməli olan orqan Prezident Adminstrasiyasıdır.

“Dövlət qulluğu haqqında” qanunun mətnindən Prezident Adminstrasiyası anlayışı ümumiyyətlə çıxarılır. Bu anlayış bir qədər mücərrəd olan “dövlət başçısının fəaliyyətini bilavasitə təmin edən orqan” anlayışı ilə əvəz edilir. Prezident Adminstrasiyası anlayışı olmayan yerdə, təbii ki, onun rəhbəri vəzifəsi də olmayacaq. Bundan başqa birinci vitse-prezident təsisatı ilə bağlı onun fəaliyyətini təmin edən struktur bölmənin rəhbərinin vəzifəsinin də adı qanunun 11-ci maddəsinə əlavə edilir”, hüquqşunas deyib.

F.Ağayev deyir ki, dəyişikliklərdən o nəticə çıxmır ki, Prezident Adminstrasiyasının rəhbəri Ramiz Mehdiyev azad edilir.

“Burada söhbət təkcə ondan gedir ki, prezidentin fəaliyyətini təmin edən orqanın adı dəyişdirilir. Əvvəl PA idi, indi mücərrəd bir orqan yaradılır. Əgər R.Mehdiyev əvvəl PA-nın rəhbəri idisə, indi də prezidentin fəaliyyətini təmin edən orqanın rəhbəri vəzifəsində qala bilər, ancaq qalmaya da bilər. Yəni, qanunverciliyə edilən bu dəyişiklikdən bilavasitə R.Mehdiyevin kənarlaşdırılması nəticəsi çıxmır. İstənilən halda onun taleyi dövlət başçısının əlindədir”.