"Gəncə işi"nin keçmiş fiqurantı yenidən həbs edilib

Gəncə Ağır Cinayətlər Məhkəməsində narkotik vasitələrin qanunsuz dövriyyəsində ittiham olunan Kamal Quliyevin işi üzrə proses başa çatıb. Məhkəmə onu 5 il 6 ay müddətinə azadlıqdan məhrumetmə cəzasına məhkum edib, bu barədə onun yaxınları bildiriblər. Quliyev daha əvvəl "Gəncə işi" üzrə mühakimə olunmuşdu.

O, 10 iyul 2018-ci il tarixində Gəncə İcra Hakimiyyətinin binası qarşısında etiraz aksiyasında iştirak etdiyinə görə saxlanılıb. Nümayiş 3 iyul 2018-ci il tarixində şəhərin o vaxtkı icra başçısı Elmar Vəliyevə qarşı sui-qəsd törədən Yunis Səfərovun həbsindən sonra təşkil olunmuşdu.

Etirazçılar Səfərova işgəncə verilməsi haqqında məlumatlara və hakimiyyətin gəncəliləri daim təhqir edən icra başçısına qarşı hərəkətsizliyinə qəzəblənmişdilər.

Etiraz aksiyası iğtişaşlara çevrilib və toqquşma zamanı iki polis zabiti öldürülüb. Nəticədə onlarla dindar saxlanılıb. Onlar zorakılıqda iştirak etdiklərini inkar ediblər, lakin işgəncə altında özlərinin əleyhinə ifadə veriblər.

Kamal Quliyevə qarşı Azərbaycan CM-in 220.1 (kütləvi iğtişaşlar) və 315.2-ci (polisə qarşı zorakılıq) maddələri ilə ittiham irəli sürülüb.

22 fevral 2019-cu il tarixində Gəncə Ağır Cinayətlər Məhkəməsi onu 8 il 6 ay müddətinə azadlıqdan məhrum edib. 2019-cu ilin avqustunda Quliyev və bu hadisələrin digər üç iştirakçısı əfv olunub.

2022-ci ildə Quliyev və "Gəncə işi"nin bir sıra digər fiqurantları - Şahin Verdiyev, Alim Yusifov, Araz Həsənov, Mireşqin Seyidov, Yavər İsmayılzadə və Elvin Nəzərov narkotik cinayətlərində ittiham edilərək yenidən həbs ediliblər.

İsmayılzadə və Quliyev 5 il 6 ay, Verdiyev 3 il 6 ay müddətinə həbs edilib. Seyidov, Həsənov və Nəzərovun işi üzrə məhkəmə davam edir.