Gənclər forumu həbs və təqibləri müzakirə edib

Müsavat Gənclər Təşkilatının sədr müavini Nigar Yaqublu, N!DA Vətəndaş Hərəkatını üzvü Zaur Qurbanlı  və ADP Gənclər Təşkilatının həbsdə olan üzvü Rəsul Mürsəlov, eləcə də  ictimai-siyasi  fəal gənclərə qarşı təzyiq və təqiblərlə  bağlı forum keçirilib. 

Müsavat Gənclər Təşkilatının təşkilatçılığı ilə keçirilən forumda AXCP, ADP, Ümid Partiyası, VHP, N!DA, Milli Fikir Mərkəzi Bütöv Azərbaycan Gənclər Təşkilatı və ölkənin digər gənclər təşkilatları bir araya gəlib. 

Forumda hakimiyyətin gənclərə qarşı təzyiqlərinin qarşısının alınması yollarına dair fikir mübadiləsi aparıblar.    

Müsavat Gənclər Təşkilatının sədri Tural Abbaslı N.Yaqublunun həbsi barədə danışarkən deyib ki, “Eurovision”  ərəfəsində aksiyalarda fəallıq edən gənclər cəzalandırılır.

“Hakimiyyət Nigar Yaqublunu həbs etməklə qırmızı xətti keçib. Heç Mircəfər Bağırov xanımlarla münasibətdə bu cür davranış göstərməyib”.

N!DA Gənclər Hərəkatının İdarə Heyətinin üzvü Üzeyir Məmmədli Zaur Qurbanlının həbsi barədə danışıb:  “Z.Qurbanlının məsələsi başdan-ayağadək siyasidir. Zaur saxlandıqdan sonra barəsində iki gün məlumat verilməyib. Hakimiyyətin gənc fəalları məhz istirahət günü saxlaması ənənə halını alıb. Zaurla bağlı verilən açıqlamalarda qanunsuz sənədlərdən söhbət açılır. Amma o bukletlərdə qanunsuz heç nə yoxdur”.

ADP sədrinin gənclərlə iş üzrə müavini Cəmil Hacıyev deyib ki, ADP fəalı Rəsul Mürsəlov aksiyalarda  fəallığına görə həbs olunub: “Rəsul Türkiyədən gələn dostu ilə birlikdə Zaqatalada istirahət edərkən saxlanılıb. Guya onlar Azərbaycan-Gürcüstan sərhədini qanunsuz keçməyə cəhd ediblər”. 

Onun sözlərinə görə, ADP fəalı iyunun 18-də saxlanılıb və ona qarşı Cinayət Məcəlləsinin 318,2 maddəsi (dövlət sərhədini qanunsuz olaraq keçmə) ilə cinayət işi qaldırılıb. 

“Saxlanmamışdan bir neçə gün öncə sahə müvəkkili Rəsulun atasını oğlu mitinqdə iştirak etdiyinə görə həbs edəcəyi ilə hədələyib. Atası ilə sahə müvəkkili arasında mübahisə olub. Rəsul və dostu isə ümumiyyətlə sərhədi keçməyiblər. O, dostu ilə Zaqatalada babasının yanına gedərkən saxlanılıb ”. 

Oktyabrın 5-də Balakən məhkəməsində R.Mürsəlovun məhkəməsi başlayıb. Məhkəmə işini oktyabrın 15-də davam etdirəcək.  

Forumda həmçinin gənclərin problemlərindən danışılıb. 

Gənclər İctimai  Palatanın oktyabrın 13-də parlamentin buraxılması tələbi ilə keçirəcəyi yürüşdə iştirak edəcək. Gənclər həmçinin oktyabrda daha 2-3 etiraz aksiyası keçirəcəklərini bəyan ediblər. -03D-