Gənclər iqtidarın repressiyasını pisləyir

“Azad Gənclik” gənclər təşkilatı rəsmi Bakının gənclərə qarşı başladığı repressiyaları pisləyən bəyanat yayıb. 

Bu təzyiqlərin seçki ilinin əvvəlindən artan xətlə davam etdiyi qeyd olunur. Saxta ittihamlar, ədalətsiz məhkəmə prosesləri ilə müxalif və müstəqil gənclər qurumlarının 10-dan çox üzvünün həbsə alındığı bildirilir. 

Gənc siyasi fəal İlkin Rüstəmzadəyə qarşı Cinayət Məcəlləsinin 221-ci (xuliqanlıq) maddəsinin iki bəndi ilə (221.2.1 və 221.2.2) ittiham irəli sürüdüyü, barəsində iki aylıq həbs qəti-imkan tədbiri seçildiyi xatırladılır. 

Prokurorluğun İ.Rüstəmzadəni dünyanın bütün ölkələrində təşkil olunan və sırf əyləncə xarakterli rəqs etmək aksiyaları olan “Harlem Shake” videosunu hazırlayıb İnternetdə yaymaqda ittiham etdiyi vurğulanır. İ.Rüstəmzadənin bu videonun hazırlanıb yayılmasında iştirakı olmadığı deyilir. Adı çəkilən videonun hazırlanması və yayılmasının xuliqanlıq saylması ölkənin hüquq-mühafizə sisteminin bərbad gündə olmasının göstəricisi adlandırılır. 

Sənəddə İ.Rüstəmzadənin həbsi sosial şəbəkələrdəki aktivliyi, əsgər ölümlərinə etiraz olan mitinqlərdəki iştirakı, bir sözlə aktiv fəaliyyətilə əlaqələndirilir. 

Gənclərə göstərilən bu münasibət pislənilir, bu özbaşınalıq ölkənin gələcəyinə biganə qalmayan gəncliyin fəallaşmasına qəsd sayıır. 

Müəlliflər gənclərə qarşı  repressiyası ilə “feodal təfəkkürlü iqtidarın öz sonunu labüdləşdirdiyi” qeyd edilir. 

Ölkədə gənclər hərəkatının güclənməsindən ehtiyat edən rəmsi Bakı bu ilin yanvarından gənclərin həbsinə, onlara təzyiqlərə start verib. 

Bu zəmində “NİDA” gənclər hərəkatının rəhbərlərindən Üzeyir Məmmədli, Rəşad Həsənov və Rəşadət Axundov, hərəkatın üzvləri Məhəmməd Əzizov, Şahin Novruzlu, Bəxtiyar Quliyev, Zaur Qurbanlı, AXCP GK üzvləri Tural Həsənzadə, Daşqın Məlikov, “Azad Gənclik” təşkilatının üzvü İlkin Rüstəmzadə də qanunsuz olaraq həbsə alınıblar. -05D-