GRECO nümayəndə heyəti Azərbaycanda korrupsiyaya qarşı mübarizəni qiymətləndirəcək

Bakı/26.09.22/Turan: Avropa Şurası Dövlətlərinin Korrupsiyaya qarşı Mübarizə Qrupunun (GRECO) nümayəndə heyəti 26-29 sentyabr tarixlərində Ölkənin qiymətləndirilməsinin beşinci mərhələsi çərçivəsində Azərbaycanda səfərdədir.

Beşinci mərhələ, xüsusən, mərkəzi icra hakimiyyəti orqanlarında və hüquq-mühafizə orqanlarında korrupsiyanın qarşısının alınmasını əhatə edir.

Üç gün ərzində nümayəndə heyəti korrupsiyanın qarşısının alınması məsələləri ilə məşğul olan müvafiq dövlət müəssisələrinin nümayəndələri ilə görüşəcək.

Səfər proqramına həmçinin vətəndaş cəmiyyəti nümayəndələri ilə görüş də daxildir. 

Səfərin yekunlarına görə nümayəndə heyəti Azərbaycanda korrupsiyaya qarşı mübarizənin qiymətləndirilməsi haqqında məruzə hazırlayacaq.

2019-cu ildə dərc edilmiş əvvəlki hesabatda GRECO Azərbaycan hakimiyyətini iradə nümayiş etdirməyə və parlament üzvlərinin, hakimlərin və prokurorların gəlirlərinin mütləq bəyan edilməsi ilə bağlı antikorrupsiya islahatını başa çatdırmağa çağırmışdı. 06D