Gültəkin Hacıyeva polisdən buraxılıb, lakin ona qarşı istintaq davam /YENİLƏNİB/

Bakı/30.11.22/Turan:  Demokratik Qüvvələrin Milli Şurasının Koordinasiya Mərkəzinin üzvü,  səhər tezdən Bakı hava limanında saxlanılan Gültəkin Hacıyeva  saat 10:00-a yaxın polisdən buraxılıb.

“Məni səhər saat dördün yarısında Brüsseldən gələndə pasport nəzarəti zamanı saxladılar. Sərhədçilər bildirdilər ki, mənim barəmdə axtarış elan edilib. Əvvəl Hava Nəqliyyatında Polis İdarəsinə, sonra Nəsimi Rayon Polis İdarəsinə apardılar”, - Hacıyeva Turan-a bildirib.

Məlum olub ki, oktyabrın 27-də ona qarşı cinayət işi açılıb.

"Sentyabrın əvvəlindən Bakıda yox idim. Mən ölkədə olmaya-olmaya mənə Cinayət Məcəlləsinin 147.2-ci maddəsilə xüsusi ittiham qaydasında cinayət işi açıblar və telefonlarım açıq olsa da nə zənglə, nə sms vasitəsilə bu barədə mənə xəbər verməyiblər. Sonra isə barəmdə axtarış elan ediblər və hətta vəkil təyin ediblər, amma bu vəkil də mənə xəbər verməyib", - Hacıyeva deyib.

Onun sözlərinə görə, cinayət işi üçün əsas Facebook-da bir istifadəçinin statusuna yazdığı şərh olub.

"Həmin istifadəçi davamlı şəkildə milli zəmində aşağılayıcı fikirlər yazırdı və mən bunun ksenofobiya və separatizm olduğunu hesab edirəm. Həmin şəxs naməlum istifadəçidir və bir neçə gün sonra paylaşımını silib. Mövcud olmayan statusa və şərhə görə məhkəmə mənim barəmdə axtarış elan edib”, - Hacıyeva deyib. 

O əlavə edib ki, axtarış və həbslə bağlı məhkəmə qərarı ləğv edilib, lakin məhkəmə prosesi yenilənib və məhkəmə prosesi dekabrın 8-nə təyin edilib.—21B-

*   *   *

2022 Noyabr 30 (Çərşənbə) 10:24:19

Gültəkin Hacıyeva "polisə" dəvət olunub - DİN /YENİLƏNİB/

Daxili İşlər Nazirliyinin Mətbuat xidmətinin KİV və İctimaiyyətlə əlaqələr şöbəsinin rəisi Elşad Hacıyev Turana Gültəkin Hacıyevanın polisdə olduğunu təsdiq edib. Onun sözlərinə görə, G.Hacıyeva araşdırma aparılması üçün aidiyyəti üzrə polis idarəsinə dəvət olunub

*   *   *

2022 Noyabr 30 (Çərşənbə) 07:51:51

Polis Gültəkin Hacıyevanı saxlayıb. O, böhtan atmaqda ittiham olunur

Bakı/30.11.22/Turan: Demokratik Qüvvələrin Milli Şurasının Koordinasiya Şurasının üzvü Gültəkin Hacıyeva bu gün səhər saat 03.30 radələrində Brüsseldən qayıdarkən Bakı hava limanında polis tərəfindən saxlanılıb.

DQMŞ Koordinasiya Şurasının üzvü Vahid Məhərrəmov Turan-a bildirib ki, Hacıyev hava limanında iki saatdan çox saxlanılıb. Ona məlumat verilib ki, Azərbaycan Cinayət Məcəlləsinin 147.2-ci maddəsi (Ağır və ya xüsusilə ağır cinayətdə ittiham etməklə böhtan atma -  iki ilədək müddətə islah işləri və ya üç ilədək müddətə azadlığın məhdudlaşdırılması və ya üç ilədək müddətə azadlıqdan məhrum etmə ilə cəzalandırılır).

Hacıyeva Bakının Nəsimi rayon Polis İdarəsinə aparılıb. Hacıyevaya qarşı iddianın kimin tərəfindən qaldırıldığı hələ məlum deyil.—0-