Gürcüstan Ermənistana partlayıcı maddələrin keçirilməsinin qarşısını alıb

Bakı/04.08.20/Turan: İki həftə öncə Gürcüstan tərəfi Rusiyadan Ermənistana gələn partlayıcı maddə yükünün qarşısını alıb. Ermənistan KİV-in məlumatına görə, bu partlayıcı maddələrdən sənaye məqsədləri, faydalı qazıntıların hasilatı, yolların tikintisi üçün istifadə olunur. Rusiya istehsalı olan partlayıcı qurğularla dolu bir neçə maşın Rusiya ilə Gürcüstan arasında Yuxarı Lars sərhəd məntəqəsində neytral zolağın üzərində dayanıb.

Mənbənin məlumatına görə, partlayıcı maddələrin istehsalçısı Rusiyanın “Promsintez” şirkətidir. Şirkət təkcə bu il Ermənistana partlayıcı yüklə dolu 40 ədəd maşın göndərib.

“Promsintez”in gecikmənin səbəbləri barədə sorğusuna Gürcüstan hökuməti cavab vermir, - “Promsintez” şirkətinin nümayəndəsi bildirib.

Qeyd edək ki, iyul ayında Serbiyadan Ermənistana Gürcüstan ərazisilə silah tədarükü ilə bağlı beynəlxalq qalmaqal yaranıb. Rəsmi Bakı Belqrad və Tbilisini qeyri-dost hərəkətlərdə ittiham edib. Serbiya silah tədarükünü etiraf edib, Gürcüstan isə silahların onun ərazisindən keçməsilə bağlı ittihamı rədd edib. -02D-