Gürcüstanın Miqrasiya Xidməti sentyabrın sonlarında Əfqan Sadıqovun işi üzrə qərarını açıqlayacaq

Sentyabrın 13-də Gürcüstan Miqrasya xidmətinin əməkdaşı Tbilisi İstintaq Təcridxanasında bu ölkədən sığınacaq istəyən Azel TV nəşrinin təsisçisi Əfqan Sadıqovla yenidən müsahibə keçirib.

Sadıqovun həyat yoldaşı Sevinc Sadıqovanın verdiyi məlumata görə, müsahibə 10.30-dan 16.45-ə qədər davam edib. Onun sözlərinə görə, sentyabrın sonlarında Miqrasiya Xidməti və Gürcüstan dövləti Əfqan Sadıqovun müraciəti ilə bağlı yekun qərarlarını açıqlayacaqlar.

Həyat yoldaşı həmçinin bildirib ki, Gürcüstan ombudsman aparatının nümayəndələri sentyabrın 12-də İstintaq Təcridxanasında Əfqana baş çəkiblər. Sadıqov kamerada normal şəraitin olmamasından, yeməyin keyfiyyətinin pis olmasından və sağlamlığı ilə bağlı problemlərdən şikayət edib.

* Əfqan Sadıqov ötən il dekabrın 24-də ailəsi ilə birlikdə Gürcüstana gedib. O, avqustun 3-də ailəsi ilə birlikdə İstanbula getmək istədiyi vaxt gürcü polisi tərəfindən saxlanılıb. Avqustun 4-də Tbilisi Şəhər Məhkəməsi onu Azərbaycana ekstradisiya etmək məqsədilə 3 ay müddətinə həbs edib.
Məhkəmədən bildiriblər ki, mayın 10-da Azərbaycan DİN Əfqan Sadıqova qarşı Azərbaycan CM-in 182.2.2 və 182.2.4-cü maddələri ilə (hədə-qorxu yolu ilə tələb etmə, başqasının əmlakını ələ keçirmə, rüsvayedici məlumatlar yaymaqla hədələmə (təkrarən törədildikdə)) ittihamlar irəli sürüb.