Hakimiyyət Məmmədəmin Rəsulzadəni yada salıb

Azərbaycan hakimiyyəti Azərbaycan Xalq Cümhuriyyətinin (1918-20-ci illər) banilərindən biri və lideri Məmmədəmin Rəsulzadənin xidmətlərini yada salıb. 

Belə ki, noyabrın 22-də dövlət başçısı İlham Əliyev 2014-cü ilin yanvarında M.Rəsulzadənin 130 illiyinin keçirilməsi barədə sərəncam verib.

Sərəncamda deyilir ki, xalqımızın müstəqillik idealının gerçəkləşdirilməsində, Azərbaycanın tarixi dövlətçilik ənənələri zəminində milli dövlət quruluşunun dirçəldilməsində, milli istiqlal ideyalarının geniş yayılmasında böyük xidmətlər göstərmiş və siyasi publisistikası ilə ədəbi-ictimai fikir tariximizə layiqli töhfələr vermiş görkəmli ictimai-siyasi xadim Məhəmməd Əmin Rəsulzadənin 130 illik yubileyinin keçirilməsi məqsədilə Mədəniyyət və Turizm Nazirliyinə, Təhsil Nazirliyinə və digər qurumlara tədbirin hazırlanması və keçirilməsi tapşırılıb. Nazirlər Kabinetinə lazımi məsələlərin həlli tapşırılıb.

Qeyd edək ki, bu cür təntənəli tədbirlərin keçirilməsi üçün bir qayda olaraq hökumət üzvlərindən dövlət komissiyası yaradılır. Komissiya müntəzəm toplantı keçirir və dövlət başçısına hesabat verir. İndiki halda isə belə deyil.

Nəzərə alsaq ki, indiyədək Bakıda Rəsulzadənin abidəsi qoyulmayıb, küçə və parklardan onunla bağlı xatirələr yığışdırılıb, onun məzarı hələ də Türkiyədədir, hakimiyyətin bu görkəmli şəxsiyyətə əsl münasibəti bəlli olur.  -02D-